සටහන – රෂිකා හෙන්නායක
කොළඹ (LNW): වර්තමානයේ වෙළෙඳපොළේ අලෙවි කිරීමට ඇති ඇතැම් භාණ්ඩ වල මිල ප්‍රදර්ශනය කිරීම පිළිබඳ ගැටලු පවතී. මේ අනුව සලකා බලා පොල්තෙල්වල වර්ගය හා මිල ප්‍රදර්ශනය කිරීම අනිවාර්ය කර ඇති බව අමාත්‍ය නලින් ප්‍රනාන්දු මහතා පවසයි.
එසේ අදාළ මිල ප්‍රදර්ශනය හා වර්ගය පාරිභෝගිකයාට හඳුනාගත හැකි වන පරිදි ප්‍රදර්ශනය නොකරන බෙදාහැරීම් ආයතන හා සිල්ලර වෙළෙඳසැල් මුද්‍රා තබන බවත් අවශ්‍ය ඉදිරි නෛතික ක්‍රියාමාර්ග ගන්නා ලෙසට පාරිභෝගික අධිකාරියට උපදෙස් ලබා දුන් බවයි.
එමෙන්ම මේ වන විට වෙළෙඳපොළේ පවතින පොල්තෙල්වල බහුලව පවතින අහිතකර පිළිකාකාරක රසායනිකයක් වන ඇෆොලටොක්සින් අඩංගු බවට පැමිණිලි ලැබී ඇති අතර මේ හේතුවෙන් දේශීය වශයෙන් නිෂ්පාදනය කරන පොල්තෙල්වල සෑම මසකටම අහඹු ලෙස නිශ්චිත ඉලක්කගත සාම්පල තොග පරික්ෂා කරන ලෙසත් උපදෙස් ලබා දී ඇත.
ඒ සම්බන්ධයෙන් පාරිභෝගික කටයුතු අධිකාරියට වාර්තාවක් ඉදිරිපත් කළ යුතු අතර ආනයනය කෙරෙන පොල්තෙල් එම අවස්ථාවේදී පරික්ෂාවට ලක් කරන ලෙසද අමාත්‍ය නලින් ප්‍රනාන්දු මහතා පවසා ඇත,
කොළඹ පැවති මාධ්‍ය හමුවකට එක් වෙමින් අමාත්‍ය නලින් ප්‍රනාන්දු මහතා මේ පිළිබඳ කියා සිටියේය.
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත??
