සටහන – රෂිකා හෙන්නායක
කොළඹ (LNW): එකතු කළ අගය මත වන බදු අනුපාතිකය 2024.01.01 සිට ක්රියාත්මක වන පරිදි සියයට 18ක් දක්වා වැඩි කිරීමට අදාළ නීති සංශෝධනය කිරීමට කැබිනට් අනුමැතිය හිමිව තිබේ.
2022 වර්ෂයට සාපේක්ෂව 2023 වර්ෂයේ මුල් මාස 09 තුළ රජයේ බදු ආදායම සියයට 51කින් ඉහළගොස් ඇති බව, කැබිනට් තීරණ ඇතුළත් නිවේදනයේ සඳහන් වන නමුත්, ජාත්යන්තර මූල්ය අරමුදල සමග එකඟ වී ඇති බදු එකතු කිරීමේ ඉලක්ක සපුරාගැනීමට මෙතෙක් හැකි වී නොමැති බවද එහි වැඩිදුරටත් සඳහන්ව තිබේ.
එබැවින්, මෙලෙස වැට් බද්ද ඉහළදැමීමේ යෝජනාවට කැබිනට් අනුමැතිය හිමිව ඇත්තේ, ජාත්යන්තර මූල්ය අරමුදල සමග එකඟ වී ඇති පරිදි බදු ආදායම් සහ ප්රාථමික ශේෂ ඉලක්කයන් සපුරාගැනීමට හැකිවනු පිණිස වේ.
තවද දැනට එකතු කළ අගය මත වන බද්ද අදාළ නොවන ඇතැම් භාණ්ඩ හා සේවා මත එකී බද්ද පැනවීම ඇතුළු නව බදු යෝජනා කිහිපයක් 2024.01.01 සිට ක්රියාත්මක කිරීමටත් අදාළ නීති සංශෝධනය කිරීම සඳහා මෙහිදී කැබිනට් අනුමැතිය හිමිව ඇත.
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත??
