ව්‍යාජ තොරතුරු ඉදිරිපත් කර විදෙස් ගමන් බලපත්‍ර සකස් කිරීම සහ හිටපු LTTE සාමාජිකයින්ගේ බිරින්දෑවරුන් විදෙස් රටවලට රැගෙන යාම සම්බන්ධයෙන් චෝදනා ලැබ අත් අඩංගුවට ගෙන සිටි කඩුගන්නාව නගරසභාවේ සභාපති ( ශ්‍රී ලංකා පොදුජන පෙරමුණ ) අමිල වේරගොඩ ඇප මත නිදහස් කිරීමට කොළඹ මහේස්ත්‍රාත් අධිකරණය ඊයේ (25) නියෝග කළේය.
ඒ, ඔහුව කොළඹ ප්‍රධාන මහේස්ත්‍රාත් බුද්ධික සී. රාගම මහතා හමුවට ඉදිරිපත් කළ අවස්ථාවේදී ය.
ආගමන විගමන දෙපාර්තමේන්තුව වෙත ව්‍යාජ තොරතුරු ඉදිරිපත් කර විදෙස් ගමන් බලපත්‍රයක් ලබාගැනීම සම්බන්ධයෙන් අපරාධ පරීක්ෂණ දෙපාර්තමේන්තුව අමිල වේරගොඩට එරෙහිව අධිකරණය හමුවේ කරුණු දැක්වූ අතර ඔහු හිටපු LTTE සාමාජිකයින්ගේ බිරින්දෑවරුන් විදෙස් රටවලට රැගෙන යාම සම්බන්ධයෙන් තොරතුරු අනාවරණය වී ඇති නමුත් ඊට සාක්ෂි ලැබී නොමැති බවයි ප්‍රකාශ කළේ.
ඒ අනුව ඔහුව රුපියල් 20000 ක මුදල් ඇපයක් සහ රුපියල් ලක්ෂ 5ක ශරීර ඇපයක් මත මුදා හැරීමට නියම කළ අධිකරණය දෙවැනි චෝදනාව සම්බන්ධයෙන් සාක්ෂි ඇත් නම් ඊට වෙනම නඩුවක් ගොනු කරන ලෙසත් නියෝග කළේය.
RN