කොළඹ LNW: මෙම වසරේ ඔක්තෝබර් මාසයේ අපනයන ආදායම පසුගිය වසරේ ඔක්තෝබරය හා සසදා බැලීමේ දී 18% කින් පහත වැටී තිබෙන බව අපනයන සංවර්ධන මණ්ඩලය විසින් නිකුත් කර තිබෙන නවතම වාර්තාවේ දැක්වෙයි.
මේ වසරේ ඔක්තෝබරයේ වෙළද භාණ්ඩ අපනයනයෙන් උපයා ඇති ආදායම ඇමරිකානු ඩොලර් මිලියන 899.91 ක් වන අතර මීට පෙර අඩුම අපනයන ආදායමක් උපයා තිබුණේ අප්‍රේල් මාසයේ දී වන බවත් එය ඇමරිකානු ඩොලර් මිලියන 814.13 ක් බවත් දැක්වෙයි.
මේ වසරේ වැඩිම අපනයන ආදායමක් උපයා තිබුණේ අගෝස්තු මාසයේදීය.
ඒ අනුව අගෝස්තු මාසයේ අපනයන ආදායම ඇමරිකානු ඩොලර් බිලියන 1.09 කි. කෙසේවෙතත් එයද පසුගිය වසරේ අගෝස්තුව හා සසදා බැලීමේ දී 13% ක පහත වැටීමක් බවයි අපනයන සංවර්ධන මණ්ඩලය පවසන්නේ.
මේ වසරේ ජනවාරි සිට ඔක්තෝබරය දක්වා කාලය තුළ සේවා අපනයනයෙන් ඇමරිකානු ඩොලර් බිලියන 2.6 ක් උපයා තිබේ. එය පසුගිය වසරේ අදාළ කාල පරිච්ඡේදය හා සසදා බැලීමේ දී 67.2% ක වැඩි වීමක් ලෙස සඳහන්.
වෙළද භාණ්ඩ අපනයනයෙන් 2023 වසරේ දී ඇමරිකානු ඩොලර් බිලියන 15.93 ක් සහ සේවා අපනයනයෙන් ඇමරිකානු ඩොලර් බිලියන 2.58 ක් උපයා ඇති අතර මෙම වසරේ දී ශ්‍රී ලංකාව භාණ්ඩ හා සේවා අපනයනයෙන් ඇමරිකානු ඩොලර් බිලියන 18.51 ක් උපයා ගනු ඇතියි අපනයන සංවර්ධන මණ්ඩලය පුරෝකථනය කර ඇත.
එහෙත් එම ඉලක්ක හඹා යාමට නොහැකි වනු ඇති බවද අපනයන සංවර්ධන මණ්ඩලය පවසා තිබේ.
ASK
