ඔබ තුළ සිටින රාජපක්ෂවාදියාව පරාජය කරන්න ….

සැබැවින්ම රාජපක්ෂවාදය යනු බැසිල්, මහින්ද, ගෝඨා, නාමල් යන පුද්ගල චරිතවලින් සැදුම් ලද්දක් නොවේ.. එය සුළු ජනවර්ග බැහැරකරනු ලැබූ උද්දච්ච ජාතිකවාදී දෘෂ්ටිවාදයකි. මෙය දේශපාලන දෘෂ්ටිවාදයක් ලෙස පැහැදිලිව දැක ගතහැකි වූයේ 56 බන්ඩාරනායකගේ ජාතිකවාදී ආගමනයත් සමඟය..

එදා බන්ඩාරනායකගේ ආගමනයද මේ ලෙසම පරිසමාප්තියට පත්වූයේ දිගුකල් පවත්නා වර්ගවාදයක් රට තුල රෝපණය කොට සහ මේ ලෙසම ලෝකයෙන් හුදෙකලා කල බංකොලොත් භාවයකට රට ඇදවට්ටමින් ය..

මේ දෘෂ්ටිවාදය පුද්ගල ප්‍රශ්නයක් නොවන්නේ මේ මුග්ධ දෘෂ්ටිවාදය මතුවෙන සෑම විටකම ඒ පසුපසින් බහුතර ජනකායක් රොද බැඳගැනීම නිසාය..

මේ රාජපක්ෂවාදයේ ඇති තවත් එක් ප්‍රබල ලක්ෂණයක් නම් ඒ තුල ප්‍රජාතන්ත්‍රවාදයට ඉඩක් නොතිබිමයි… ඔවුන්ගේ මතයට පිටින් මත පලකරන්නන් එදා දේශද්‍රෝහීන්, පරගැතියන්, කළවම් ජාන ඇත්තවුන් යනුවෙන් නිග්‍රහයට භාජනය කෙරුනි..

මේ මොහොතේ ඔවුන්ගේ පොහොට්ටු කොඩි කනුවල තණ කොල මිටි බැඳ තිබීම තුලින් පෙරලා ඔවුන් වෙත ලැබී තිබෙන්නේද ඔවුන් වගාකල කෲර විසම්මුතියම බව අපට සිතිය හැකිය..

ඒ අනුව රාජපක්ෂවාදය යනු යුග යුග ගණන් ඉතිහාසයේ පසුපසින් එන අපේම දෝශයක් ලෙස තේරුම් ගෙන එය පුද්ගල ප්‍රශ්නයකට ඌණනය නොකර එය දෘෂ්ටිවාදයක් ලෙස ගෙන පරාජය කරන තුරු එය විවිධ නාමකරණ තුලින් යලියලිත් පෙනීසිටිය හැකිය.. එහි විසම්මුතික හොල්මන් විවිධ ස්වරූප වලින් යලි යලිත් එළිබැසිය හැකිය ….

~ ප්‍රියශාන්ත රාජපක්ෂ

RN