සටහන – රෂිකා හෙන්නායක
ජනවාරි 06 කොළඹ (LNW): නව වසරේ පළමු කාර්තුව අවසන් වන විට නිසා ජනතාවගේ ජීවන බර 75% කින් අඩුවන බව වෙළඳ, වාණිජ හා ආහාර සුරක්ෂිතතා අමාත්‍ය නලින් ප්‍රනාන්දු මහතා පැවසීය. ඒ 2024 වර්ෂය ධන ආර්ථික වර්ධන වේගයක් සහිතව ආරම්භ කිරීම නිසා බවයි ඔහු පවසන්නේ.
තවදුරටත් අමාත්‍යවරයා සඳහන් කළේ, පාරිභෝගික අධිකාරිය වෙනුවෙන් මෙම වසර තුළ නව වැඩපිළිවෙලක් සකස් කිරීමට බලාපොරොත්තු වන බවත් එමඟින් පාරිභෝගික අයිතිවාසිකම් වඩාත් සුරක්ෂිත කිරීමට කටයුතු කරන බවයි.
ඉදිරි සති දෙක තුළ ඉන්දියාව සිය ලූණු අපනයන සීමා ලිහිල් කිරීමත් සමග එම ගැටලුව විසදෙන බවත් ප්‍රකාශ කළේය.
වෙළඳ, වාණිජ හා ආහාර සුරක්ෂිතතා අමාත්‍ය නලින් ප්‍රනාන්දු මහතා වැඩිදුරටත් පැවසූවේ,
” 2024 වර්ෂය අප ආරම්භ කරන්නේ ධන ආර්ථික වර්ධන වේගයක් සමගයි. ඒ සමග මෙම වසරේ පළමු කාර්තුව අවසන් වන විට ජනතාවගේ ජීවන බර 75% කින් අඩුවන බව සඳහන් කළ යුතුයි. පවතින බදු ප්‍රතිපත්තිය නිසා ඉදිරියේදී ජනතාවට තවත් සහන රැසක් ලැබෙන බවට ද අපට සහතික විය හැකියි.
ඒ වගේම රාජ්‍ය ආදයම ඉහළ නංවාගැනීම වෙනුවෙන් බදු අයකිරීම වැරදි බව ඇතැමුන් පවසනවා. නමුත් එවැනි ප්‍රකාශ සිදුකරන්නන් රටේ ආර්ථිකය වර්ධනය වනවාට එරෙහි වන්නන් බව පැවසිය යුතුයි. රටේ අනාගතය වෙනුවෙන් ආයෝජන කරන්නේ රජයට ලැබෙන බදු ආදායමෙන් නම් ඒ සඳහා සහයෝගය දැක්වීම සමස්ත ජනතාවගේම වගකීමක් වනවා.
තවද ඇතැමුන් බදුබර වැඩි බව පවසමින් රට හැර යනවා. නමුත් මෙරට බදු අය කිරීම සිදු කෙරෙන්නේ 12% ක මට්ටමකින්. එහෙත් රට හැර යන පිරිස් ආකර්ශනය වී ඇති රටවල බදු ප්‍රතිශතය 38% සිට 43%ක පමණ මට්ටමක ඉහළ අගයක පවතිනවා. එම රටවල්වල් සංවර්ධනය වී තිබෙන්නේ එවැනි බදු ප්‍රතිපත්තියක් අනුගමනය කරන නිසයි.
ඉන්දියාව ලූනු අපනයනය නැවැත්වීම නිසා එහි පීඩනය අපේ රටට ද බලපා තිබෙනවා. නමුත් ඉන්දියාව ඊළඟ සති දෙක තුළ ලූනු අපනයන සීමා ලිහිල් කිරීමෙන් පසු එම ගැටළුව විසදෙන බව ද සඳහන් කළ යුතුයි.
කෙසේ වෙතත් අපට සිදුව ඇති හානිය වන්නේ, වැට් ඇතුළු බදු සංශෝධන සම්බන්ධයෙන් කිසිදු අධ්‍යයනයක් සිදු නොකොට ඇතැම් පාර්ශ්ව විවිධ ක්‍රම ඔස්සේ අනිසි ප්‍රචාරයක් ලබාදීමයි. මේ තත්ත්වය තුළ අතරමැදියන් සහ ඇතැම් සමාගම් හිතුමතේ මිල ගණන් ඉහළ දමා ජනතාවට පීඩනයක් එල්ල කර තිබෙනවා.
2024 වසරේ මුල් කාර්තුව තුළ ලංකා සතොසට නවතම මෙගා (mega) අලෙවිසැල් 05ක් හා සාමාන්‍ය ලංකා සතොස අලෙවිසැල් 10ක් ආරම්භ කිරීමට යෝජිතයි. ඒ වගේම මෙම වසර අවසාන වන විට ලංකා සතොස අලෙවිසල් ජාලය අලෙවිසල් 500ක් දක්වා පුළුල් කිරීමට ද සැලසුම් කර තිබෙනවා.
සමස්ත අලෙවිසැල් ජාලය අලෙවිසැල් 500 දක්වා වර්ධනය කිරීම තුළින් පාරිභෝගිකයන් සඳහා හිඟයකින් තොරව රජයේ සහන මිලට භාණ්ඩ මිලදී ගැනීමට අවස්ථාව සලසා දීම මෙම අලෙවිසල් ජාලය ව්‍යාප්ත කිරීමේ ප්‍රමුඛ පරමාර්ථය වනවා.
තවද, 2024 වසරේදී ලංකා සතොස සමාගමේ මුළු ආදායම රුපියල් බිලියන 70ක ආසන්නයකට ගෙන ඒමටත්, එමගින් සමස්ත මෙහෙයුම් ලාභය රුපියල් බිලියන 1.5 කට ආසන්න ප්‍රමාණයක් දක්වා ගෙන ඒමටත් සැලසුම් කර තිබෙනවා. ඒ වගේම රටේ පවතින ආර්ථික අභියෝග හමුවේ ආයතනයේ ශුද්ධ ලාභය රුපියල් මිලියන 500ක් දක්වා සුරක්ෂිත කර ගැනීමට ද සැලසුම් කොට තිබෙනවා.
2024 වර්ෂය තුළ පාරිභෝගික අධිකාරිය සදහා නව වැඩපිළිවෙලක් සකස් කිරීමට ද බලාපොරොත්තු වනවා. එමඟින් පාරිභෝගික අයිතිවාසිකම් වඩාත් සුරක්ෂිත කිරීමට කටයුතු කරනවා. කිරුම් මිණුම් දෙපාර්තමේන්තුව සම්පූර්ණයෙන්ම පරිගණක ගතකර ජනතාවගේ අවශ්‍යතාවන් ඉටුකිරීම මෙම වසරේ පළමු මාස හතර තුළ සිදුකරන බව ද සඳහන් කළ යුතුයි “
වෙළඳ, වාණිජ හා ආහාර සුරක්ෂිතතා අමාත්‍ය නලින් ප්‍රනාන්දු මහතා මේ බව සඳහන් කර සිටියේ ‘ස්ථාවර රටකට සැවොම එක මඟකට’ මැයෙන් ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.
