UN

යුක්රේන - රුසියා යුද අර්බුදය හේතුවෙන් අධිවේගයෙන් ඉහළ ගිය බොරතලේ මිල මේ වනවිට යළිත් එම වේගයෙන්ම පහළ යමින් තිබෙනවා. මේ වනවිට බොරතලේ බැරලයක මිල ඇමරිකානු ඩොලර් 100 ටත් අඩු අගයක් දක්වා පහත වැටී ඇති බවයි වාර්තා වන්නේ.

මුහුණ දී ඇති අර්බුදයෙන් රට ගලවා ගැනීමට දේශපාලනඥයන්ට වැඩපිළිවෙලක් තිබෙන බවට ජනතාව තුළ කිසිදු විස්වාසයක් නොමැති බව එජාප නායක රනිල් වික්‍රමසිංහ මහතා පවසනවා.

දෙමළ ජාතික සන්ධානයේ නියෝජිතයන් සහ ජනාධිපති ගෝඨාභය රාජපක්ෂ මහතා අතර සාකච්ඡාවක් අද පැවැත්වීමට නියමිතව තිබිණි. ඊයේ රාත්‍රී වනවිටත් මෙම සාකච්ඡාව නියමිත පරිදි පැවැත්වීමට සූදානම්ව සිටි නමුත් අවසන් මොහොතේදී එය අවලංගු කිරීමට ජනාධිපතිවරයාගේ පාර්ශ්වය තීරණය කර තිබෙනවා.

සමගි ජන බලවේගයේ මෙහෙයවීමෙන් අද කොළඹදී පැවැත්වෙන විරෝධතාවය සඳහා පැමිණෙ ලක්ෂ ගණන් ජනතාව සමග ජනාධිපති ලේකම් කාර්යාලය වෙත යාමට සමගි ජන බලවේගයේ නායක සජිත් ප්‍රේමදාස මහතා තීරණය කර තිබෙනවා. ප්‍රේමදාස මහතා සිය පාර්ලිමේන්තු මන්ත්‍රී කණ්ඩායම සමග පැවැත්වූ සාකච්ඡාවකින් අනතුරුව අද පෙරවරුවේ මෙම තීරණයට එළඹ තිබේ.

සමගි ජන බලවේගයේ මූලිකත්වයෙන් අද කොළඹදී පැවැත්වෙන විරෝධතාවය සඳහා සහභාගි වන ජනතාව මේ වනවිට කොළඹ නගරය වෙත පැමිණෙමින් සිටින බව එම පක්ෂයේ සංවිධායකයන් පවසනවා. මේ වනවිටත් බස්රථ 1500 කට වැඩි ප්‍රමාණයක් කොළඹ පැමිණ ඇති බවයි වාර්තා වන්නේ.