- රජයේ භාණ්ඩාගාර බිල්පත් සහ බැඳුම්කර සම්භාර ඉකුත් සතිය තුළ රු. බිලියන 16,244 සිට රු. බිලියන 16,347 දක්වා රු. බිලියන 103 තරම් වූ අතිවිශාල ප්‍රමාණයකින් ඉහළ ගොස් ඇති බව මහ බැංකු දත්ත පෙන්වා දෙයි: එම සතිය තුළම භාණ්ඩාගාර බිල්පත් සහ බැඳුම්කරවල පැවති හොට්-මනි (hot-money) ආකාරයේ ආයෝජන ඇ.ඩො. මිලියන 350 සිට ඇ.ඩො. මිලියන 339.3 දක්වා ඇ.ඩො. මිලියන 11 කින් පහත වැටී ඇති බව ද පෙන්නුම් කරයි: රටේ ණය තත්ත්වය දැවැන්ත අවදානම් තත්ත්වයක් කරා සීඝ්‍රයෙන් ගමන් කරමින් තිබෙන බවට විශ්ලේෂකයෝ අනතුරු අඟවති.
- ලංකා විදුලිබල මණ්ඩලයේ මෙම වසරට අදාළ අනුමත අභ්‍යන්තර අයවැය තුළින් රු. බිලියන 73 ක ලාභයක් පෙන්නුම් කරන නමුත්, තම සාමාන්‍ය විදුලිය ගාස්තු 3.4% කින් අවම කිරීම සාධාරණීකරණය කිරීම සඳහා එම මණ්ඩලය විසින් මහජන උපයෝගීතා කොමිෂන් සභාව වෙත ඉදිරිපත් කර තිබෙන්නේ රු. බිලියන 23.7 ක් තරම් වූ සාපේක්ෂව අවම අතිරික්තයක් පමණි: 2024 සඳහා වන මෙහෙයුම් ගාස්තු 2022 වැය වූ රු. බිලියන 97 සිට රු. බිලියන 164 දක්වා 70% ක දැවැන්ත ඉහළ යාමක් පෙන්නුම් කරයි.
- ජාත්‍යන්තර මූල්‍ය අරමුදල සමඟ කටයුතු කිරීම සම්බන්ධයෙන් තම පාර්ශවයට කිසිඳු ගැටළුවක් නොමැති බව ජනතා විමුක්ති පෙරමුණ ප්‍රමුඛ ජාතික ජන බලවේගය පවසයි: එහෙත් ජාත්‍යන්තර මූල්‍ය අරමුදලේ වැඩසටහන ජාතික අවශ්‍යතාවන් හා අනුකූල විය යුතු බව අවධාරණය කරයි: ජාතික වගකීම හා අනුකූල වීම සඳහා විශාල වෙනස්කම් සිදුකළ යුතු බව තම පක්ෂය ඉල්ලා සිටින බව ජනතා විමුක්ති පෙරමුණේ හිටපු පා.ම. සුනිල් හඳුන්නෙත්ති පවසයි.
- මීළඟ මැතිවරණයේ දී ජාතික ජන බලවේගය බලයනට පැමිණෙන බව, ලොව බොහෝ රටවල් මෙන්ම ජාත්‍යන්තර මූල්‍ය අරමුදල වැනි සංවිධාන අවබෝධ කර ගෙන ඇති බව ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා පවසයි: ජාතික ජන බලවේගය හා ජාත්‍යන්තර මූල්‍ය අරමුදල අතර ඉකුත් දින ඇතිවූ හමුව සම්බන්ධයෙන් සමඟි ජන බලවේගය වික්ෂිප්තභාවයට පත්ව ඇති බව පවසයි: රටේ ආර්ථික තත්ත්වය සහ බදු පැනවීම තුළින් ජනතාවට එල්ලවන බලපෑම පිළිබඳව තම පක්ෂය ජාත්‍යන්තර මූල්‍ය අරමුදල සමඟ සාකච්ඡාකළ බව ද පවසයි.
- සීනි වංචාවක් සිදුව ඇති බව පවසන කාලසීමාවට අදාළව ආනයනිකයන් විසින් ලබන ලද අතිරේක ලාභවලට අදාළව දේශීය ආදායම් දෙපාර්තමේන්තුව විසින් බදු පමුණුවන බව එම දෙපාර්තමේන්තුවේ කොමසාරිස් ජනරාල් ඩබ්.ඒ.එස්. චන්ද්‍රසේකර පවසයි.
- සාමාන්‍යයෙන් ඡන්ද නාමලේඛණවලට නව ඡන්දදායකයන් 300,000 පමණ එක්වූව ද, 2023 වර්ෂය සඳහා එක්ව තිබෙන්නේ නව ඡන්දදායකයන් 207,000 පමණක් බව මැතිවරණ කොමසාරිස් ජනරාල් සමන් ශ්‍රී රත්නායක පවසයි: මැතිවරණයක් පවත්වන්නේ නම්, මෙම ඡන්දදායකයන් 207,000 දෙනාට ඡන්දය ප්‍රකාශකළ හැකි බව පවසයි.
- 2024 රාජ්‍ය වෙසක් උත්සවය සැමරීම සඳහා මූල්‍ය සහාය ලබා දෙන මෙන් රජය එක්සත් ජාතීන්ගෙන් ඉල්ලා සිටි බව ආගමික හා සංස්කෘතික කටයුතු අමාත්‍ය විදුර වික්‍රමනායක පවසයි: චීන සංස්කෘතික ප්‍රවර්ධනය, බෞද්ධ සංස්කෘතිය සහ කලා සංගමය අමාත්‍යවරයාගේ ඉල්ලීමට එකඟතාවය පළකළ බවට වාර්තාවන අතර, ශ්‍රී ලංකාවේ බෞද්ධ භික්ෂූන්වහන්සේලාට මහායාන බුදුදහම අධ්‍යයනය කිරීම සඳහා චීනයට සංචාරය කිරීමට අවස්ථා සලසා දීමට එකඟතාවය පළකළ බව ද සඳහන්.
- ආයෝජකයන්ට විදේශ මුදල්වලින් ගනුදෙනු කිරීමට සහ විදෙස් ආයෝජකයන් සමඟ ගනුදෙනු කිරීමට ඉඩ සලසන බැංකු සහ මූල්‍ය සේවා රෙගුලාසි හඳුන්වා දෙන ලෙස කොළඹ වරාය නගරය රජයෙන් ඉල්ලා ඇති බව බලධාරී ආරංචිමාර්ග පවසයි: යම් අනිවාර්ය පරිවර්තනයක් හෝ මුදල් ආපසු ගෙන්වා ගැනීමක් වැළැක්වීම සඳහා මෙම පියවර ගෙන ඇති බව සඳහන්.
- කොන්ත්‍රාත්කරු විසින් සපයන ලද වගකීම් කාලය අවසන් වීමට වසර ගණනාවකට පෙරාතුවම දුම්රිය හරස් මාර්ග සීනුව සහ සැහැල්ලු අනතුරු ඇඟවීමේ පද්ධති 50 ක් අක්‍රිය වී ඇති බව ජාතික විගණන කාර්යාලය අනාවරණය කරයි: මෙමඟින් දුම්රිය දෙපාර්තමේන්තුවට රු. මිලියන 243 ක පමණ අලාභයක් සිදුව ඇති බව ද සඳහන්.
- පොලිස් නිලධාරීන් සිවිල් ඇඳුමින් සිටින විට වාහන පරීක්ෂාව සඳහා වාහන නවතා නොගන්නා මෙන් වැඩබලන පොලිස්පති දේශබන්දු තෙන්නකෝන් සියලුම පොලිස් ස්ථානවලට උපදෙස් දෙයි: සිවිල් ඇඳුමින් සිටි පොලිස් උප පරීක්ෂකවරයකු ධාවනය කරමින් තිබූ වාහනයක් නවතන මෙන් විධානකළ විට රියදුරා වාහනය නොනවතමින් දිගටම ධාවනය කිරීම හමුවේ එම පොලිස් උප පරීක්ෂකවරයා විසින් රියදුරාට වෙඩි තැබීමේ සිදුවීමක් වාර්තා වීමත් සමඟ මෙම පියවර ගෙන ඇත.
