සටහන – රුවන් නෙළුගොල්ල
හිටපු ජනාධිපති රනිල් වික්‍රමසිංහ මහතා පොරොන්දු වූයේ 2048 වනවිට රට හැදීමට වුවත් ජාතික ජන බලවේගයේ ආණ්ඩුව දැන්ම රට හැදීමට පටන් ගෙන ඇති බව වැවිලි කර්මාන්ත හා ප්‍රජා යටිතල පහසුකම් අමාත්‍ය සමන්ත විද්‍යාරත්න මහතා පවසයි.
“රනිල් වික්‍රමසිංහ මහත්තයා තමයි අපේ ජනාධිපතිතුමාට ඉස්සෙල්ලා ජනාධිපතිතුමා. මේ රට කවදා වෙනකොට හදලා දෙන්නම් කියලාද එයා පොරොන්දු වුණේ ? 2048. 2048 වෙනකොට තමයි රස්සා දෙනවා කිව්වේ, ආර්ථිකය හදනවා කිව්වේ, පඩි වැඩිකරනවා කිව්වේ. මේ 2026. පොහොර සහනාධාරය වැඩිවෙනවා, මහපොළ වැඩිවෙනවා, වකුගඩු ආධාර වැඩිවෙනවා, පොල් වගාව වැඩිවෙනවා, අලුත් රස්සා දෙනවා, පඩි වැඩිවෙනවා. ඒ හින්දා තේරුම් ගන්න එයාලා ඒ කාලෙම කිව්වා මේ රට හදන්න වෙන්නෙ අපි මැරුණාට පස්සෙ කියලා. නමුත් අපි දැන් ඉඳන් පටන් ගත්තා. හැමෝම තේරුම් ගන්න, මේ රට දැන් හැදෙන්න පටන් අරන් තියෙන්නෙ. හැදෙනකොට ඒකට ගොඩක් අය සතුටුයි. හැබැයි හොරාට සතුටු නෑ. හොරා කැමති වෙයිද හොරකම් නවත්වන්න ? ඌ සතුටු නෑ. කුඩු ගේන එකා කැමති වෙයිද කුඩු නවත්වන්න ? ඌ සතුටු නෑ. පාතාලෙ එකා කැමති නෑ. ඒ හින්දා අපිට විරුද්ධවාදීන් ඉන්නවා. ඒ හතුරෝ දැන් ඔක්කෝම එකතුවෙලා – ඔය වැඩි හරියක් ඉන්නෙ විපක්ෂයේනෙ – ආණ්ඩුවට දෝස්මුරයක් දානවා. එයාලාට හිතවත් මාධ්‍ය කීපයක් මේවාට ගහනවා. සමාජ මාධ්‍ය ගහනවා. ඔබ තමුන්නාන්සෙලාට මම කියනවා, ඒවාට අහුවෙන්න එපා. දුර බලන්න. මේ උත්සාහ ගන්නේ ඔබේ දරුවාට රටක් හදන්න. අපි පොහොසත් රටක් – ලස්සන ජීවිතයක් හදලා දෙනවා කිව්වා. තවම අවුරුදු දෙකයි. තාම ආණ්ඩුව ළපටියි. මේ අවුරුදු පහ යනකොට බලන්න, මීට වඩා විශාල වැඩකොටසක් කෙරෙනවා”
සමන්ත විද්‍යාරත්න මහතා මේ බව පැවසුවේ ඊයේ (01) බදුල්ල, රිදීමාලියද්ද ප්‍රදේශයේ පැවති පොල් පැළ බෙදාදීමේ උත්සවයක් අමතමිනි.
