සටහන – රුවන් නෙළුගොල්ල
අත් අඩංගුවට ගෙන සිටි හිටපු අමාත්ය අනුර ප්රියදර්ශන යාපා ඇතුළු සැකකරුවන් සිව්දෙනා ඇප මත මුදාහැරීමට කොළඹ මහේස්ත්රාත් අධිකරණය නියෝග කර තිබේ.
ඊයේ පස්වරුවේ අනුර ප්රියදර්ශන යාපා සහ ඔහුගේ බිරිඳ අපරාධ පරීක්ෂණ දෙපාර්තමේන්තුව විසින් අත් අඩංගුවට ගෙන තිබිණු අතර අද (ජනවාරි 23) දහවල් ඔවුන් ඇතුළු සැකකරුවන් සිව්දෙනෙකු කොළඹ මහේස්ත්රාත් අධිකරණයට ඉදිරිපත් කරනු ලැබිණි.
එහිදී දීර්ඝ කරුණු සලකා බැලීමකින් අනතුරුව ඔවුන්ව ඇප මත මුදාහැරීමටයි කොළඹ අතිරේක මහේස්ත්රාත් හර්ෂණ කැකුණවල මහතා නියෝග කර ඇත්තේ.
ඔවුන්ව අත් අඩංගුවට ගෙන තිබුණේ 2014 වසරේදී බිංගිරිය, නාරම්මල ප්රදේශවල ගංවතුරින් අවතැන් වූ පුද්ගලයන්ට සහන සැලසීමේ මුවාවෙන් ඛනිජ තෙල් නීතිගත සංස්ථාව මගින් රුපියල් 6,146,110 ක මුදලක් ලබාගෙන, එම කටයුත්ත සඳහා භාවිතා නොකර එම මුදල් 2015 ජනාධිපතිවරණ ප්රචාරක කටයුතු සඳහා යොදවා ගැනීමේ චෝදනාව මත ය.
