සංශෝධිත නව බදු ප්‍රතිපත්තිය ඇතුළු ඉල්ලීම් කිහිපයක් මුල් කරගනිමින් අද (08) දින ලංකා විදුලි බල මණ්ඩලයේ සේවකයින් ලෙඩ නිවාඩු වාර්තා කර ප්‍රධාන කාර්යාලය ඉදිරිපිටට රැස්වී විරෝධතාවක නිරත විය.
පසුගිය කාලය තුළ ලංවිම වෘත්තීය සමිති විසින් සිය ගැටළු බලධාරීන් වෙත ඉදිරිපත් කළද ඒවාට නිසි ප්‍රතිචාර නොදී තවදුරටත් නිහඬ ප්‍රතිපත්තියක හිඳීම හේතුවෙනුයි මෙලෙස සංකේත විරෝධතාවක් සංවිධානය කර තිබුණේ.
අසාධාරණ බදු ප්‍රතිපත්තිය වහාම හකුළා ගැනීමට රජය කටයුතු නොකරන්නේ නම් මේ වන විට පැවැත්වෙන උසස් පෙළ විභාගය අවසාන වූ පසු දැවැන්ත වෘත්තීය ක්‍රියාමාර්ගයක් වෙත යොමුවන බවටයි එම වෘත්තීය සමිති ඒකාබද්ධ සන්ධානය අවධාරණය කළේ.
අද දින පැවැත්වූ සංකේත වැඩවර්ජනය හේතුවෙන් රටේ විදුලි කප්පාදුවක් සිදුවීමට ඉඩ නොදෙන බවද එම වෘත්තීය සමිති සඳහන් කළ අතර කිසිලෙසකින්වත් ජනතාව පෙළීමට සූදානම් නැති බවත් සොයා පැමිණෙන්නේ පාලකයන් බවත් ඔවුන් වැඩිදුරටත් ප්‍රකාශ කරන ලදී.
ආශිකා බ්‍රාහ්මණ
