කොළඹ LNW:එක්සත් ජාතික පක්ෂයෙන් තම කණ්ඩායම ඉවත්වී එය දෙකඩ නොවුනානම් හොඳ යයි තමන් අදටත් කල්පනා කරන බව සමඟි ජන බලවේගයේ පාර්ලිමේන්තු මන්ත්‍රීනී තලතා අතුකෝරළ මහත්මිය පවසයි.
තමන් එම මොහොතේ එක්සත් ජාතික පක්ෂයෙන් වෙන්වූයේද දැඩි කලකිරීමකින් බවයි ඇය සඳහන් කරන්නේ.
සමඟි ජන බලවේගයේ කළමනාකාර මණ්ඩලය මාස ගණනාවකින් රැස්ව නැති බව පවසන ඇය පක්ෂයට විවිධ පිරිස් සම්බන්ධ කර ගනිද්දී එම මණ්ඩල සමඟ සාකච්ඡා කිරීම වඩා සුදුසු බවයි පවසන්නේ.
එසේ සාමූහික සාකච්ඡාවක් තුළින් තීන්දු නොගැනීම නිසා යම් යම් ගැටලු ඇති වී තිබෙන බවත් මන්ත්‍රීවරිය සඳහන් කරයි.
එම ක්‍රමවේදයේ ගැටලු හේතුවෙන් තමන් පක්ෂයෙන් මේ දිනවල යම් නිහඬතාවයක සිටින නමුත් එය පක්ෂයට හෝ පක්ෂ නායකයාට අභියෝග කිරීමක් නොවන බවද ඇය කියාසිටියි.
එක්සත් ජාතික පක්ෂය හා සමඟි ජන බලවේගය එක් විය යුතුය යන මතයේ තමන් 2020 වසරේ සිට සිටිය බවත් ඒ සඳහා සාකච්ඡා වට ගණනාවක්ම පැවැත්වූ බවත් අතුකෝරල මහත්මිය සඳහන් කරයි.
මෙම පක්ෂ දෙක එකතු කළ යුතුය යන මතයේ පක්ෂයේ තවත් පිරිසක් සිටිනා බව පවසන ඇය පක්ෂය ඉදිරියේ ජයග්‍රහණය කරන වැඩපිළිවෙලක් මෙන්ම අර්බුදයක ඇති රට ගොඩගන්නා වැඩපිළිවෙලක්ද තිබිය යුතු බවයි පවසන්නේ.
ASK
