ආශිකා බ්‍රාහ්මණ
කොළඹ LNW:විදෙස් ණය ගෙවීමකදී අස්ථානගත වූ ඩොලර් මිලියන 2.5 මුදල සම්බන්ධ සිද්ධියෙන් මතුව ඇති තත්ත්වය හමුවේ මුදල් අමාත්‍යාංශ ලේකම් හර්ෂණ සූරියප්පෙරුම මහතාට විරෝධය පළකිරීමට ගිය විපක්ෂය නියෝජනය කරන හිටපු ජනාධිපති ගෝඨාභය රාජපක්ෂගේ හිටපු පෞද්ගලික ලේකම් සුගීෂ්වර බණ්ඩාර ඇතුළු නව ජනතා පෙරමුණේ පාක්ෂිකයින් පිරිසට ගොම ප්‍රහාරයක් එල්ල වී තිබේ.
හර්ෂණ සූරියප්පෙරුම මහතාට විරෝධය දැක්වීම සඳහා සුගීෂ්වර බණ්ඩාර ඇතුළු පිරිස පැලවත්ත, අකුරේගොඩ ප්‍රදේශයේ පිහිටි ඒ මහතාගේ නිවස අසලට ගොස් තිබුණු අතර එම පිරිස සූරියප්පෙරුම මහතගේ නිවාස ඉදිරිපිට විරෝධය පළකරමින් සිටියදී ප්‍රදේශවාසීන් ඊට විරුද්ධත්වය ප්‍රකාශ කරමින් විරෝධතාකරුවන්ට ගොම ප්‍රහාරයක් එල්ල කර ඇත.
අනතුරුව විරෝධතාවට පැමිණි පිරිස ප්‍රදේශවාසීන්ගේ විරෝධය සහ හූ හඬ මැද එම ස්ථානයෙන් පිටතට පැමිණි තිබුණි.
තත්ත්වය සමථයකට පත් කිරීම සඳහා පොලීසියද එම ස්ථානයට කැඳවනු ලැබීය.
අනතුරුව ප්‍රදේශවාසීන් මාධ්‍ය වෙත ද අදහස් දක්වන ලදී.
