ජනාධිපති ගෝඨාභය රාජපක්ෂ මහතාට එරෙහිව ඉදිරිපත් කරන කිසිදු යෝජනාවකට තම කණ්ඩායමේ සහයෝගය හිමි නොවන බව පාර්ලිමේන්තු මන්ත්‍රී වාසුදේව නානායක්කාර මහතා පවසනවා. ඔහු මේ බව සඳහන් කළේ සමගි ජන බලවේගය විසින් කතානායකවරයා වෙත ඉදිරිපත් කර ඇති විස්වාසභංග යෝජනාව සම්බන්ධයෙන් මාධ්‍යයට අදහස් දක්වමිනි.
තම පක්ෂයේ සහාය එවැනි යෝජනාවකට කිසිසේත්ම හිමි නොවන බවත්, තම කණ්ඩායම නියෝජනය කරන සෙසු පක්ෂද ඒ සඳහා සහයෝගය ලබාදෙනු ඇතැයි අපේක්ෂා නොකරන බවත් මන්ත්‍රීවරයා සඳහන් කරයි.
ජනාධිපතිවරයාට එරෙහිව විස්වාසභංග යෝජනාවක් ඉදිරිපත් කිරීමේ කිසිදු අවශ්‍යතාවයක් නොමැති බවත්, මතුව ඇති අර්බුදකාරී තත්වය ජනාධිපතිවරයා තනතුරේ සිටියදීම විසඳා ගත හැකි බවත් වාසුදේව නානායක්කාර මහතා පවසයි. ජනාධිපතිවරයාගේ බලතල අඩු කිරීමට අවශ්‍ය නම් එය 21 වැනි සංශෝධනය හරහා සිදුකළ හැකි බවත් ඔහු පෙන්වා දෙනවා.
පක්ෂ 11 කණ්ඩායමේ සාකච්ඡාවකින් අනතුරුව මාධ්‍යයට අදහස් දක්වමින් මේ බව සඳහන් කළ අතර එහිදී පාර්ලිමේන්තු මන්ත්‍රී උදය ගම්මන්පිල මහතා ප්‍රකාශ කළේ අගමැතිවරයා ඉල්ලා අස් වී සියලු පක්ෂ නියෝජනය කරන ආණ්ඩුවක් පිහිටුවීමෙන් අර්බුද විසඳා ගත හැකි බවයි.
UN
