රෂිකා හෙන්නායක මැයි 04, කොළඹ LNW :
ගාල්ල බන්ධනාගාරය තුළ රැඳවියන් පිරිසක් උපන්දින සාදයක් පවත්වන අයුරු දැක්වෙන වීඩියෝවක් සමාජ මාධ්‍ය ඔස්සේ ප්‍රචාරය වීමත් සමඟ ඒ පිළිබඳ විධිමත් පරීක්ෂණයක් ආරම්භ කර ඇත.
මෙම සිදුවීම සම්බන්ධයෙන් වහාම වාර්තාවක් ලබාදෙන ලෙස බන්ධනාගාර දෙපාර්තමේන්තුව අදාළ බලධාරීන්ට නියෝග කර තිබේ.
එම දර්ශනවල පෙනී සිටින පුද්ගලයන් අතර ප්‍රබල අපරාධ කල්ලි සාමාජිකයෙකුගේ සමීපතමයෙකු සිටින බවට හඳුනාගෙන ඇති අතර, එහි සිටින බොහෝ පිරිසක් මේ වන විට ඇප මත නිදහස්ව ගොස් ඇති බව සඳහන් වේ.
බන්ධනාගාර පාලනාධිකාරිය උත්සාහ කරන්නේ මෙම සාදය සැබවින්ම පැවැත්වූ කාලවකවානුව සහ පසුබිම පිළිබඳ නිශ්චිත තොරතුරු අනාවරණය කර ගැනීමටයි.
යුක්තිය සහ නීතිය ක්‍රියාත්මක කිරීමේ ක්‍රියාවලිය විනිවිදභාවයකින් යුතුව පවත්වාගෙන යාම සඳහා මෙම අභ්‍යන්තර විමර්ශනය ඉතා වැදගත් වේ.
