ගෙවුණු බංගලාදේශ – ශ්‍රී ලංකා කාන්තා විස්සයි විස්ස ක්‍රිකට් තරගාවලියේ තරගාවලියේ වීරවරිය වූ හර්ෂිතා අබේවික්‍රම ඒ සම්මානය ගැන ශ්‍රී ලංකා ක්‍රිකට් වෙබ් අඩවියට අදහස් ප්‍රකාශ කරමින් පැවසුවේ එම සම්මානය තමන්ගේ කැපවීමේ සහ පුහුණුවේ ප්‍රතිපලයක් ලෙසයි.මෑත කාලයේ ගෙවුණු තරගාවලි ගණනාවක පිත්තෙන් හොද දස්කම් දැක් වූ හර්ෂිතා ගෙවුණු ලෝක කුසලාන තරගාවලියේදී ද ශ්‍රී ලංකා කණ්ඩායම වෙනුවෙන් ඉහළ දස්කම් දැක් වූවාය.
පුහුණුකරු රුමේෂ් රත්නායක නිතර උපදෙස් දෙන්නේ පන්දු ඕවර් 20 පිටියේ රැඳී සිටින ලෙස බව පවසන හර්ෂිතා,එම අවවාදය, අවසාන විස්සයි විස්ස ජයග්‍රහණය වෙනුවෙන් නිලක්ෂි ද සිල්වා සමඟ ලකුණු 102 ක නොබිදි සබඳතාවයට හේතු වූ බව ද පෙන්වා දෙයි.ජ්‍යේෂඨ ක්‍රීඩිකාව හැටියට කණ්ඩායම් නායිකා චමරි අතපත්තු අලුත් ක්‍රීඩිකාවන්ට දක්ෂතා අතරට එන්නට කරන මඟ පෙන්විම ඉහළින් අගය කළ හර්ෂිතා මේ තරගාවලියේදි නව යොවුන් ක්‍රීඩිකාවන් හැටියට විශ්මි ගුණරත්න, කවීෂා දිල්හාරි සහ කාව්‍යා කාවින්දි යන ක්‍රීඩිකාවන් දැක් වූ දක්ෂතාවයන් අගය කළාය.
හර්ෂිතා 25 වන වියේ පසුවන අතර නුගේගොඩ අනුලා විද්‍යාලයෙන් සිප් සතර හැදෑරූ ඇය අවුරුදු 19 න් පහළ සහ 24 න් පහළ ශ්‍රී ලංකා කණ්ඩායම්වලට නායකත්වයද ලබා දී ඇති අනාගත නායකත්ව බලාපොරොත්තුවකි. පුහුණු කාර්ය මණ්ඩලයට මෙන්ම මාධ්‍යයට සහ ප්‍රේක්ෂකයන් ඇතුළුව සියලුම දෙනා ට සිය ස්තූතිය පුද කළ හර්ෂිතා මෑථ කාලයේ දක්වන ලද දස්කම් සමඟ ශ්‍රී ලංකා කණ්ඩායමේ විශ්වසනියම පිතිකාරිණය බවට වැඩෙමින් සිටින්නීය.එය හර්ෂිතාට ක්‍රීඩිකාවක් හැටියටත්,ශ්‍රී ලංකා කාන්තා ක්‍රිකට් කණ්ඩායමටත් ආශිර්වාදයක් වන ලකුණක් ය.
සටහන – නිශ්මං රණසිංහ
