සුරාබදු පනත උල්ලංඝනය කරමින් සුරාබදු දෙපාර්තමේන්තුව විසින් මත්පැන් නිෂ්පාදන සමාගම්වලට මත්පැන් සිල්ලර අලෙවිය සඳහා බලපත්‍ර නිකුත් කිරීම ඇතුළු අක්‍රමිකතා රැසක් නිසා රජයට වසරකට රුපියල් බිලියන 130ක පමණ බදු මුදලක් අහිමිවන බව ශ්‍රී ලංකා මත්පැන් බලපත්‍රධාරීන්ගේ සංගමය පවසයි.
එම සංගමයේ මාධ්‍ය ප්‍රකාශක ඩලස් ප්‍රනාන්දු මහතා පැවසුවේ මත්පැන් අලෙවියෙන් වසරකට රුපියල් බිලියන 300ක පමණ බදු ආදායමක් ලබාගත හැකි නමුත් මේ වනවිට සුරාබදු දෙපාර්තමේන්තුව රජයට උපයා දෙන්නේ රුපියල් බිලියන 170කට අඩු මුදලක් බවයි.
ශ්‍රී ලංකාවේ අලෙවි කරන රා වලින් 90% ක්ම ප්‍රමිතියෙන් තොර පැවසූ ඒ මහතා රා නිෂ්පාදනයේදී ශරීරයට අහිතකර නොයෙකුත් විෂ ද්‍රව්‍ය එකතු කරන බවට රස පරීක්ෂක වාර්තාවලින් ද සනාථ වී ඇති බවත් සඳහන් කළේය.
සුරාබදු දෙපාර්තමේන්තුවේ ඇතැම් දූෂිත නිලධාරීන්ගේ සහයෝගය මත නීතිවිරෝධී මත්පැන් ජාවාරම් දිවයින පුරාම ක්‍රියාත්මක වන අතර මේ වනවිට නීතිවිරෝධී මත්පැන් ජාවාරම් 300% කින් පමණ ඉහළ ගොස් ඇති බවත් ඩලස් ප්‍රනාන්දු මහතා ප්‍රකාශ කළේය.
RN
