සටහන – පුලී
ජූනි 01, LNW (කොළඹ):ආලෝකයෙන් දිළිසුණු වෙසක් රාත්රියක්… දන්සල් අසල සිනහවෙන් පිරුණු ජනතාවක්… රොටි දන්සලක උණුසුම් ආහාරයක් ලබාගැනීමට පෝළිමේ සිටි පවුල් රැසක්… නමුත් මිනිත්තු කිහිපයකින් එම සතුටින් පිරි වාතාවරණය කඳුළු, විලාප සහ මරණ පුවත් වලින් පිරුණු අඳුරු රාත්රියක් බවට පත් විය.
මීගොඩ ප්රදේශයේ වෙසඟේ අසිරිය මැද පැවැති රොටි දන්සලක් අසල පෝළිමේ රැඳී සිටි ජනතාව අතරට අධික වේගයෙන් ධාවනය වූ කැබ් රථයක් කඩා වැදීමෙන් පුද්ගලයින් හය දෙනෙකු ජීවිතක්ෂයට පත්වූ අතර තවත් හත් දෙනෙකු බරපතළ තුවාල ලබා රෝහල්ගත කරනු ලැබීය. මියගිය පිරිස අතර 15 හැවිරිදි පාසල් සිසුවියක්, කාන්තාවන් තිදෙනෙක් සහ පිරිමි පුද්ගලයින් තිදෙනෙක් සිටින බව පොලිසියට අනාවරණය කර ගැනීමට හැකි විය. අනතුරෙන් පසු පලා යාමට උත්සාහ කළ රියදුරා මත්පැන් පානය කර සිට ඇති බවටද මූලික පරීක්ෂණවලදී හෙළි වී තිබේ.
මෙය වෙසක් සමයේ වාර්තා වූ එකම ඛේදවාචකය නොවේ. පොලිස් දත්ත අනුව වෙසක් නිවාඩු දින දෙක තුළ පමණක් රිය අනතුරු 19ක් වාර්තා වී ඇති අතර පුද්ගලයින් 24 දෙනෙකු ජීවිතක්ෂයට පත්ව තිබේ. මියගිය අය අතර පදිකයින්, යතුරුපැදිකරුවන් සහ සාමාන්ය මගීන් ද සිටීම විශේෂයෙන් කනගාටුදායක කරුණකි.
වෙසඟ යනු කරුණාව, දානය සහ මනුෂ්යත්වය සැමරෙන උතුම් සමයක් වුවද, නොසැලකිලිමත් රිය ධාවනය, මත්පැන් භාවිතය, අනාරක්ෂිත විදුලි සම්බන්ධතා සහ ජනතාවගේ අවධානම් නොසලකා හැරීම හේතුවෙන් සෑම වසරකම මෙම ආගමික උත්සවය මරණ සහ කඳුළු සමඟ අවසන් වන අවස්ථා දක්නට ලැබේ.
දන්සලකින් රොටියක් ලබාගැනීමට පැමිණි පවුල් කිහිපයක් මිනිත්තු කිහිපයකින් අවසන් ගමන දක්වා යෑම, වෙසක් ආලෝකය යට සැඟවී ඇති අනතුරු පිළිබඳ රටටම දැඩි අනතුරු ඇඟවීමක් බවට පත්ව ඇත. “සතුට බෙදාදෙන වෙසක් අසිරිය” මරණ පුවත් බෙදාදෙන උත්සවයක් නොවීමට නම්, ආරක්ෂාව සෑම දෙනාගේම පළමු වගකීම විය යුතුය.
මෙවර වෙසක් දිනයන් අපට උගන්වන කටුක පාඩම පැහැදිලිය. එක් නොසැලකිලිමත් තත්පරයක්… ජීවිත සිය ගණනක් වුවද බිලිගැනීමට ප්රමාණවත්ය.
