කොළඹ LNW:ශ්රී ලංකාව සහ තායිලන්තය අතර පවතින දීර්ඝකාලීන ආර්ථික, සංස්කෘතික සහ ඓතිහාසික සබඳතා, වර්තමාන ගෝලීය ප්රවණතාවලට ගැළපෙන පරිදි වෙළෙඳ, සංචාරක, තාක්ෂණ සහ තිරසාර සංවර්ධන ක්ෂේත්ර ඔස්සේ තවදුරටත් පුළුල් කිරීමට රජය සූදානම් බව විදේශ කටයුතු, විදේශ රැකියා සහ සංචාරක අමාත්ය විජිත හේරත් ප්රකාශ කළේය.
අමාත්යවරයා මේ බව ප්රකාශ කළේ ඊයේ (19) කොළඹදී පැවැත්වුණු ශ්රී ලංකා – තායිලන්ත ව්යාපාරික කවුන්සිලයේ (Sri Lanka–Thailand Business Council) 25 වැනි සංවත්සර මහා සභාවේ ප්රධාන ආරාධිත අමුත්තා ලෙස සහභාගී වෙමින් විශේෂ දේශනයක් සිදුකරමිනි.
එහිදී වැඩිදුරටත් අදහස් දැක්වූ අමාත්යවරයා, පසුගිය වසර 25ක කාලය පුරා ශ්රී ලංකාවේ පෞද්ගලික අංශය සහ තායිලන්තය අතර ද්විපාර්ශ්වික ආර්ථික සබඳතා වර්ධනය කිරීම වෙනුවෙන් මෙම ව්යාපාරික කවුන්සිලය ඉටුකළ ස්ථාවර හා කැපී පෙනෙන මෙහෙවර ඇගයීමට ලක් කළේය. වසර 25ක සන්ධිස්ථානයක් සපුරාලීම යනු හුදෙක් පැවැත්ම පමණක් නොව, අන්යෝන්ය විශ්වාසය හා රැකබලා ගත් සබඳතාවල ප්රතිඵලයක් බවද ඔහු පෙන්වා දුන්නේය.
විශේෂයෙන්ම දෙරටේ ව්යාපාරික ප්රජාවන් එකිනෙකට සමීප කරවීමටත්, මෙතෙක් නොතිබූ නව අවස්ථා උදාකර දීමටත් කවුන්සිලය කටයුතු කර ඇති බව පැවසූ අමාත්ය විජිත හේරත් මහතා, ශ්රී ලංකාව සහ තායිලන්තය අතර ව්යවසායකයින් හා ජනතාව යා කරන ප්රායෝගික පාලමක් ලෙස මෙම කවුන්සිලය ක්රියා කර ඇති බවද සඳහන් කළේය. වසරින් වසර දෙරට අතර ක්රමයෙන් වර්ධනය වන ආනයන හා අපනයන වෙළෙඳ පරිමාවන්, ඒකාබද්ධව අත්කරගත් ප්රගතියේ පැහැදිලි දර්ශකයක් බවද ඔහු අවධාරණය කළේය.
ඉදිරි අනාගතය දෙස බැලීමේදී දෙරටටම අත්කරගත හැකි වෙළෙඳ, සංචාරක, ප්රවාහන හා සැපයුම් දාම, තාක්ෂණික සහ තිරසාර සංවර්ධන ක්ෂේත්රයන්හි සැබෑ අවස්ථා රැසක් පවතින බවත්, ඒ සඳහා නිරන්තර සහයෝගීතාව සහ විශ්වාසය පෙරදැරිව ඉදිරියට යාම අත්යවශ්ය බවත් අමාත්යවරයා මෙහිදී පෙන්වා දුන්නේය. ආගමික, සංස්කෘතික හා ඓතිහාසික සබඳතාවලින් ශක්තිමත් වූ දෙරටේ මිත්රත්වය, වර්තමානයේ වර්ධනය වන ආර්ථික සහයෝගීතාව සහ ජනතාව අතර පවතින සුහදශීලී සන්නිවේදනය තුළින් වඩාත් තහවුරු වන බවද ඔහු පැවසීය.
ශ්රී ලංකා – තායිලන්ත ව්යාපාරික කවුන්සිලය ඉදිරි වසරවලදී ද දෙරටටම නව සහයෝගීතා මාවත් විවෘත කරමින් වඩාත් අර්ථවත් ලෙස වර්ධනය වනු ඇතැයි තමන් විශ්වාස කරන බව පැවසූ අමාත්යවරයා, පසුගිය වසර 25 ක කාලය තුළ මෙහි සාර්ථකත්වයට දායක වූ සැමට සිය කෘතඥතාව පිරිනමමින් කවුන්සිලයේ ඉදිරි ගමනට සුබ පැතුම් එක් කළේය.
