සටහන – නිශ්මං රණසිංහ
ජූලි 07, (LNW) කොළඹ :
රොහාන් සිරිසේන මෑතක් වන තුරුම ශ්‍රී ලංකාවේ මේස පන්දු කේෂ්ත්‍රයේ ඉහළින්ම කියැවි නමකි.කේවල මෙන්ම පිරිමි යුගල අංශයේදී ද ඉදිරියෙන්ම සිටි,දශක දෙකකට අධික කාලයක් මේස පන්දුවෙන් ශ්‍රී ලංකාව නියෝජනය කර ඇති රොහාන් සිරිසේන එම දක්ෂතා වර්ධනය කර ගන්නට කිසිඳු අවස්ථාවක විදෙස් පුහුණුවකට හෝ යොමු නොකෙරුණු ක්‍රීඩකයෙකි.එහෙත් ඉතා කැපවීමෙන් ක්‍රීඩාවේ නියැලෙමින් දැණුමද හැකියාවද පොහොසත් කර ගත් රොහාන්,මේ වන විට විදේශිකයන් පුහුණු කිරීමේ අවස්ථාව හිමි වූ පුහුණුකරුවෙක් බවට පත් වි ඇත.
ඇමෙරිකාවේ උතුරු කැලිෆෝනියා හී විශාල පිරිසක් මේස පන්දු පුහුණුව සඳහා යොමු වී ඇති Table Tennis America මේස පන්දු ක්‍රීඩා සමාජයේ පුහුණුකරුවෙක් ලෙස වැඩ කිරීමට රොහාන්ව බඳවාගෙන ඇත.වයස අවුුරුදු 5 සිට අවුරුදු 60 ද ඉක්මවා සිටින බොහෝ පිරිසක් මේ ක්‍රීඩා සමාජයේ තරගකාරී මට්ටමේ සිට සිය සෞඛ්‍ය සම්පන්නභාවය වෙනුවෙන් ද පුහුණුවීම් කර ගෙන යාම සඳහා එක්වෙන ස්ථානයකි.
ශ්‍රී ලංකාවේ ක්‍රීඩාව වෙනුවෙන් ඉහළ පහසුකම් මෙන්ම සැළකිලි ද නොලැබ ඉතා අපහසුවෙන් ක්‍රීඩා කළ ද,ශිල්පීය ගුණාංග මහන්සියෙන් කැපවීමෙන් ඔප මට්ටම් කර ගතහොත් එම දක්ෂතා ලෝකය විවෘතව පිළිගන්නා සාධකයක් බව රොහාන්ගේ මේ දස්කම ගැන අවධානය යොමු කරන විට පැහැදිළිව තේරුම් ගැනීමට හැකියාව ඇත.මේ වන විට ඇමෙරිකාවේ කැපී පෙනෙන ළමා ක්‍රීඩිකාවන් දෙපළක් වන තිළිණ පියදාසගේ දූවරුන් වන ටාෂියා සහ ටියානා ගේ පුහුණු කටයුතු නිසා තිළිණ ද මේ වන විට අවධානය දිනා ගත් පුහුණුකරුවෙකි.තිළිණ සහ රොහාන් දීර්ඝ කාලයක් ශ්‍රී ලංකා මේස පන්දු කේෂ්ත්‍රයේ කැපී පෙණුන යුගල සූරයන්ය.
