හිටපු අමාත්‍ය විමල් වීරවංශ මහතාගේ සොයුරු සරත් වීරවංශ ජුලි 22 වනදා දක්වා රක්ෂිත බන්ධනාගාරගත කරන ලෙස කොළඹ කොටුව මහේස්ත්‍රාත් පසන් අමරසේන මහතා ඊයේ (15) නියෝග කළේය.
ඒ, විමල් වීරවංශ මහතා අමාත්‍ය ධුරයක් දැරූ සමයේ රජයේ වාහන 40ක් අවභාවිතා කළ බව කියන සිද්ධියේ සැකකරුවකු වශයෙන් ඔහුව අත් අඩංගුවට ගෙන ඊයේ පස්වරුවේ අධිකරණයට ඉදිරිපත් කළ අවස්ථාවේදී ය.
මෙම සිද්ධියට අදාළව සරත් වීරවංශ සැකකරුවකු වශයෙන් නම්කරන බව මීට පෙර නඩුවාරයේදී පොලිස් මූල්‍ය අපරාධ විමර්ශන කොට්ඨාසයේ නිලධාරීන් අධිකරණයට දැනුම් දී තිබිණි.
ඔහු පානදුර ප්‍රදේශයේ තමන්ට අයත් නිවසක සිටින බවට නිලධාරින්ට ලැබී තිබූ තොරතුරකට අනුව එහි ගිය ද එම අවස්ථාවේදී සරත් වීරවංශ මහතා එහි සිට නොමැති අතර ඊයේ දිනයේදී ඔහු ගම්පහ ප්‍රදේශයේ සිටින බවට ලැබුණු තොරතුරක් අනුව එහි ගොස් මෙසේ ඔහුව අත් අඩංගුවට ගෙන ඇත.
