සටහන – පුලී
ජූලි 19, LNW (කොළඹ): උඹලා හැදුනේ අපේ අත්වල යන කියමන පසක් කරමින් පාපන්දු ලෝකයේ ලස්සනම අහඹු කතාවක් අද යථාර්ථයක් වෙන්න යනවා. ඉරිදා(අද) පැවැත්වෙන FIFA World Cup 2026 අවසන් මහා තරගයේදී, ලියොනල් මෙසී සහ ලාමින් යමාල් පළමු වරට එකිනෙකාට එරෙහිව පිටියට පිවිසීමට සියල්ල සූදානම්.
මෙය ඔවුන්ගේ පළමු තරගය වුණත්, පළමු හමුවීම නම් නෙවෙයි!
2007දී, බාර්සිලෝනා ක්‍රීඩකයෙකු ලෙස ඉදිරියට එමින් සිටි 20 හැවිරිදි මෙසී, ඡායාරූප වැඩසටහනක් අතරතුර මාස පහක් වයසැති බිළිඳෙකු දෑතින් තුරුළු කර නාවමින් ඡායාරූපයකට පෙනී සිටියා. ඒ පුංචි බිළිඳා තමයි අද ස්පාඤ්ඤයේ සුපිරි තරුව බවට පත්ව සිටින ලාමින් යමාල්.
ඡායාරූප ශිල්පී ජොආන් මොන්ෆෝර්ට් විසින් ගත් එම ඡායාරූප වසර ගණනාවකට පසු නැවත ලෝකයේ අවධානය දිනාගත්තේ Euro 2024 තරගාවලියේදී යමාල්ගේ දස්කම් සමඟයි. එම ඡායාරූපයක් සමාජ මාධ්‍යයට එක් කරමින් යමාල්ගේ පියා ලියා තිබුණේ, “පුරාවෘත්ත දෙකක ආරම්භය” යන සරල නමුත් අර්ථවත් වදනක්.
දැන් කාලය වෙනස් වෙලා. එදා මෙසීගේ දෑතින් නාවන ලද පුංචි බිළිඳා, අද ලෝක කුසලානයක් වෙනුවෙන් ඔහුගේ විරුද්ධවාදියා වෙලා. සමහර කතා ලියන්නේ ජීවිතයයි… මේකත් එහෙම කතාවක්.
