නිශ්මං රණසිංහ අගෝස්තු 07, කොළඹ LNW:
ආරක්ෂක සේවා ක්‍රීඩා කවුන්සිලය විසින් 13 වැනි වරටත් සංවිධානය කරනු ලැබු ආරක්ෂක සේවා ක්‍රීඩා තරගාවලියේ කරාතේ ශූරතාවලියේ අවසන් මහා තරඟ පසුගියදා පනාගොඩ ශ්රී ලංකා යුද හමුදා ගෘහස්ථ ක්‍රීඩාංගණයේදී සාර්ථකව අවසන් කරන ලදී.
මෙම තරඟාවලියේදී ත්‍රිවිධ හමුදාව තුළ වර්ධනය වන තරඟකාරිත්වය සහ කරාතේ ක්‍රීඩාවේ ඉහළ ප්‍රමිතීන් ඉස්මතු කරමින් සුවිශේෂී දස්ෂතා දක්වමින් ශ්රී ලංකා ගුවන් හමුදා කාන්තා කරාතේ කණ්ඩායම 13 වන ආරක්ෂක සේවා කරාතේ ශුරතාවය දිනා ගැනීමට සමත් වීය. ගුවන් හමුදා පිරිමි කණ්ඩායම එම ඉසව්වේ පිරිමි අංශයේ අනුශූරතාවය දිනා ගැනීමට සමත් වූ අතර එහි ශූරතාවය යුධ හමුදාව සතු විය.
මෙම තරගාවලියේ ත්‍යාඟ සහ සහතිකපත් ප‍්‍රධානෝත්සවයේ ප්‍රධාන ආරාධිත අමුත්තා ලෙස මේජර් ජෙනරාල් ආර් ඩී සලේ සහභාගි වූ අතර අවසන් මහා තරගයට ගුවන් හමුදා කරාතේ සභාපති එයාර් වයිස් මාර්ෂල් වජිර සේනාධීර, ගුවන් හමුදා කරාතේ ලේකම් ගෘප් කැප්ටන් අමරසිංහ හා ත්‍රිවිධ හමුදාවේ ජ්‍යෙෂ්ඨ නිලධාරීන් හා සෙසු නිලයන් රැසක් සහභාගී වූහ.
