සමනල වැව ජලාශයෙන් උඩවලව ජලාශය වෙත ජලය මුදාහැරේ

සටහන – රෂිකා හෙන්නායක

කොළඹ (LNW): සමනල වැව ජලාශයෙන් උඩවලව ජලාශය වෙත ජලය මුදාහැරීම ආරම්භ කර ඇත.

විදුලිබල රාජ්‍ය අමාත්‍ය ඩී. වී චානක මහතා  පැවසුවේ අද (08) අලුයම 03 සිට පළමු වටයේ දින තුනක් සඳහා ජලය මුදාහැරීම ආරම්භ වූ බවයි.

දිනකට කියුබික් මීටර් මිලියන 3.5 බැගින් ජලය මුදාහැරීමට නියමිත බවද ඔහු පැවසීය.

වසර 20 කට පසු මහවැලි වලව කලාපයට බලපෑ දරුණුතම වියළි කාලගුණයත් සමඟ උඩවලව ජලාශයේ ජලය සිඳීයාමෙන් ඇති වූ අර්බුදකාරි තත්ත්වය මේ වනවිට විශාල ආපදාවක් වී ඇති අතර , අක්කර අඩි 217,800ක සමස්ත ජල ධාරිතාවක් දැරිය හැකි උඩවලව ජලාශයේ සක්‍රීය ජල ධාරිතාවය ඊයේ (07) උදෑසන වන විට අක්කර අඩි 956 දක්වා පහළ බැස තිබුණි.

එය ප්‍රතිශතයක් ලෙස ගත් කල ජලාශයේ සමස්ත ජල ධාරිතාවෙන් 0.45%ක අගයක් බවත්, සාමාන්‍ය තත්ත්වයක් යටතේ දිනකදී තත්ත්පරයට අක්කර අඩි 3,200ක ජල ධාරිතාවයක් ගොවිතැන් කටයුතු සඳහා මුදාහරින උඩවලව ජලාශයෙන් පෙරේදා දිනයේ මුදාහැර තිබුණේ අක්කර අඩි 934ක වැනි සීමිත ජල ධාරිතාවකි.  ඒ දකුණු ඇළෙන් අක්කර අඩි 521ක ජල ප්‍රමාණයකුත්, වම් ඇළෙන් අක්කර අඩි 413ක ජල ප්‍රමාණයකුත් ගොවිබිම් කරා ගලාගොස් තිබුණි.

මහවැලි අධිකාරිය පවසන්නේ , පෙරේදා දිනය (06) දිනය තුළ සමනල වැවෙන් සහ වේලි ඔයෙන් ගලා ආ අක්කර අඩි 545ක ජල ධාරිතාවයක් උඩවලව ජලාශයට එකතු වී ඇති බවයි.

එම අධිකාරියේ තොරතුරුවලට අනුව,මේ වනවිට වාර්තා වී ඇත්තේ මෑත ඉතිහාසයේ උඩවලව ජලාශයේ සක්‍රීය ජල මට්ටම පහළ බැසි අඩුම මට්ටම වේ.

තවද, මහවැලි අධිකාරියේ තොරතුරු වලට අනුව  අනාවරණය වන්නේ, උඩවලව ජලාශයේ ප්‍රමාණවත් ජල ප්‍රමාණයක් ගොවිබිම් වෙත ගලා නොයෑම හේතුවෙන් මේ වනවිට ආසන්න වශයෙන් හෙක්ටයාර 800ක පමණ කුඹුරු ප්‍රමාණයක් සහ අතිරේක බෝග වගාකර තිබු හෙක්ටයාර 100ක් පමණ විනාශ වී ඇති බවයි.

කෙසේවෙතත් ඊයේ පස්වරුවේ කැබිනට් මණ්ඩලය ජනාධිපතිවරයාගේ ප්‍රධානත්වයෙන් රැස්වූ අතර එහිදී කෘෂිකාර්මික කටයුතු සඳහා අවශ්‍ය කරන ජල ධාරිතාව සමනල වැව ජලාශයෙන් උඩවලව ජලාශයට නිකුත් කිරීම සඳහා කැබිනට් අනුමැතිය ලබාදී තිබුණි.

කැබිනට් මණ්ඩලය වැඩිදුරටත් තීරණය කර ඇත්තේ ජාතික විදුලි බල අවශ්‍යතාවය සඳහා විකල්ප ක්‍රමවේද සෙවීමට සහ කෘෂිකර්ම අමාත්‍ය මහින්ද අමරවීර මහතා සඳහන් කළේ , වගාහානි වූ ගොවීන්ට වන්දි ලබාදීමට ද ජනාධිපතිවරයා එකඟතාව පළකළ බවයි.

රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත??