සෞඛ්‍ය අමාත්‍ය කෙහෙළිය රඹුක්වැල්ල මහතාට එරෙහිව සමගි ජන බලවේගය විසින් ඉදිරිපත් කර ඇති විශ්වාසභංග යෝජනාව අද (08) දිනයේත් පාර්ලිමේන්තුවේදී විවාදයට ගැනීමට නියමිත ය.
ඊයේ සහ පෙරේදා දිනවලදීත් මෙම විශ්වාසභංග යෝජනාව පිළිබඳ විවාදය පැවැත්වුණු අතර අදත් විවාද කර අද පස්වරු 05.00 ට එහි ඡන්ද විමසීම පැවැත්වීමට නියමිතව ඇත.
ඖෂධ හිඟය, බාල ඖෂධ හේතුවෙන් රෝගීන් මරණයට පත්වීම, වෛද්‍ය උපකරණ හිඟය සහ යන්ත්‍ර බිඳවැටීම්, වෛද්‍ය හිඟය යනාදී සෞඛ්‍ය ක්ෂේත්‍රයේ ගැටලු ගණනාවකට පිළිතුරු සැපයීමට කෙහෙළිය රඹුක්වැල්ල මහතාට නොහැකිවීම පිළිබඳව චෝදනා කරමින් සමගි ජන බලවේගය විසින් මෙම විශ්වාසභංග යෝජනාව ඉදිරිපත් කර ඇති අතර ආණ්ඩු පක්ෂය පවසන්නේ මේවාට සෞඛ්‍ය ඇමතිවරයා වගකිවයුතු නැති බවත් මෙම විශ්වාසංභංගය ආණ්ඩුව බිඳවැට්ටවීම සඳහා විපක්ෂය කරන කුමන්ත්‍රණයක් බවත් ය.
කෙසේවෙතත් ඊයේ දිනයේ පැවති දේශීය ආදායම් සංශෝධන පනත් කෙටුම්පත පිළිබඳ ඡන්ද විමසීමේදී ආණ්ඩු පක්ෂයට හිමිව තිබුණේ ඡන්ද 103ක් පමණි. ආණ්ඩු පක්ෂයේ මන්ත්‍රීවරුන් 20 දෙනෙකු පමණ එම ඡන්ද විමසීමට පැමිණ සිටියේ නැත. විපක්ෂයේ මන්ත්‍රීවරුන් ද 40 දෙනෙකු පමණ එම ඡන්ද විමසීමට පැමිණ නොසිටි අතර අද දිනයේදී ඒ දෙපාර්ශවයේම මන්ත්‍රීවරුන් මෙම විශ්වාසභංග ඡන්ද විමසීමට පැමිණෙන ආකාරය අනුව ප්‍රතිඵලය තීරණය වනු ඇත. ආණ්ඩු පක්ෂය පවසන්නේ කෙහෙළිය රඹුක්වැල්ල මහතාව ජයග්‍රහණය කරවන බවයි.
RN
