ආශිකා බ්‍රාහ්මණ
කොළඹ LNW:ලබන මාර්තු මාසයේදී ජාත්‍යන්තර මූල්‍ය අරමුදල සමඟ පවතින එකඟතාව අවසන් වීමට නියමිත තිබෙන නමුත් මාර්තු මාසයෙන් පසු ජාත්‍යන්තර මූල්‍ය අරමුදලෙන් ඉවත් වනවාද නැතහොත් ඉදිරි සංවර්ධන කටයුතු වෙනුවෙන් ඔවුන්ගේ සහය තවදුරටත් ලබාගන්නවාද යන්න පිළිබඳ රජය මෙතෙක් අවසන් නිල තීරණයක් ගෙන නොමැති බව ආර්ථික සංවර්ධන නියෝජ්‍ය අමාත්‍ය නිශාන්ත ජයවීර මහතා පැවසුවේය.
නියෝජ්‍ය අමාත්‍යවරයා මේ බව පැවසුවේ ඊයේ (10) පස්වරුවේ කොළඹ පැවති උත්සවයකින් අනතුරුව මාධ්‍ය වෙත අදහස් දක්වමිනි.
ජාත්‍යන්තර මූල්‍ය අරමුදල විසින් ලබාදී තිබෙන ඉලක්ක ඉටු කිරීමේදී ශ්‍රී ලංකාව ප්‍රශස්ත මට්ටමක සිටින හෙයින් ඉදිරි වාරික ලැබීම ගැන ගැටළුවක් නොමැති බවද නියෝජ්‍ය අමාත්‍යවරයා සඳහන් කළේය.
මේ අතර මැදපෙරදිග ගැටුම් යළි උත්සන්න වීමත් සමඟ තෙල් මිල ඉදිරියේදී වැඩි වනු ඇත්ද යන්න එහිදී මාධ්‍යවේදීන් විමසා සිටි අතර ඊට පිළිතුරු දෙමින් නියෝජ්‍ය අමාත්‍යවරයා පැවසුවේ තෙල් මිල රජයේ පාලනයෙන් බැහැර කාරණයක් වන හෙයින් අවස්ථානුකූලව ඒ වෙනුවෙන් කටයුතු කරන බවයි.
පසුගිය මැයි මාසයේ වුවද තෙල් මිල ඉහළ යාම හමුවේ එහි දැඩි බලපෑමක් සිදුවන ප්‍රජාවන් හදුනාගෙන ඔවුන්ට අවශ්‍ය සහන ලබාදීමට රු. බිලියන 100ක් රජය වෙන් කළ බවත් පැවසූ නියෝජ්‍ය අමාත්‍යවරයා තවදුරටත් කියාසිටියේ මොහොතේ විදුලි බිලද ඉහළ නොදමා එම වැය බරද රජය විසින් දරාගත් බවයි.
ඒ අනුව තෙල් මිල ඉදිරියේදී ඉහළ යාම ගැන මේ මොහොතේ පුරෝකථන ඉදිරිපත් කළ නොහැකි හෙයින් අවස්ථානුකූලව ඊට මුහුණ දෙන බව නියෝජ්‍ය අමාත්‍යවරයා වැඩිදුරටත් අවධාරණය කරන ලදී.
