ජාත්‍යන්තර සංවිධානවලින් එල්ල වන බලපෑම් පරාජය කිරීමට නම් සියලු ශ්‍රී ලාංකිකයන් එකට එක්විය යුතු බව එක්සත් ජාතික පක්ෂයේ පාර්ලිමේන්තු මන්ත්‍රී වජිර අබේවර්ධන මහතා පවසනවා. එනිසා සියලු දේශපාලන වාදබේද ඉවත දමා සියලු දේශපාලන පක්ෂ ජනාධිපතිවරයාට සහාය ලබාදිය යුතු බවද මන්ත්‍රීවරයා පෙන්වා දෙනවා.
ශ්‍රී ලංකාව වැනි රටවල සැමවිටම දුර්වල නායකයන් බලයට පත්වීම බලවත් රටවල අපේක්ෂාව බවත්, රනිල් වික්‍රමසිංහ මහතා වැනි අත්දැකීම් සපිරි, දේශපාලනය, ජාත්‍යන්තර සබඳතා පිළිබඳව අවබෝධයක් සහිත පුද්ගලයෙකු රටේ නායකත්වයට පත්වීම එම රටවලට ගැටලුවක් වී ඇති බවත් පෙන්වා දෙන වජිර අබේවර්ධන මහතා පවසන්නේ, බලවත් රටවල් රනිල් වික්‍රමසිංහ මහතා දෙස සැකයෙන් බලන බවයි. ඇතැම් විට බොහෝ රටවල් රනිල් වික්‍රමසිංහ මහතා හේතුවෙන් බියට පත්ව ඇතැයි අනුමාන කළ හැකි බවද මන්ත්‍රීවරයා සඳහන් කරනවා.
මේ නිසා යළිත් දුර්වල නායකත්වයක් අතට රට පත්වීම වළක්වා ගැනීම මහජනතාවගේ වගකීමක් බවත්, ජනාධිපතිවරයාට සහයෝගය ලබා දෙන්නැයි සියලු දේශපාලන පක්ෂවලට මහජනතාව බලපෑම් කළයුතු බවත් අබේවර්ධන මහතා පවසනවා.
2048 වනවිට ශ්‍රී ලංකාව සංවර්ධිත රාජ්‍යයක් බවට පත් කිරීම වික්‍රමසිංහ ජනාධිපතිවරයාගේ එකම අපේක්ෂාව බවත්, එවැනි දූරදර්ශී දේශපාලනඥයෙකු රටේ නායකත්වයට පත්වූයේ රටේත් සමස්ත මහජනතාවගේත් වාසනාවට බවත් මන්ත්‍රීවරයා අවධාරණය කරනවා.
UN
