රෂිකා හෙන්නායක ඔක්තෝබර් 02, කොළඹ LNW :
ඩුබායි සිට ටෙල් අවිව් දක්වා පියාසර කරමින් තිබූ ෆ්ලයිඩුබායි (flydubai) ගුවන් යානය තුළදී සිය සහායක නියමුවාගේ පිහි ප්‍රහාරයට ලක්වූ ඉන්දීය ගුවන් නියමුවා, එම අමුතු ප්‍රහාරය සහ උපකාර ලබා ගැනීම සඳහා කොක්පිට් (cockpit) දොර විවෘත කිරීමට දැරූ දැඩි උත්සාහය ඉන්දීය අගමැති නරේන්ද්‍ර මෝදි සමඟ පැවැති වීඩියෝ ඇමතුමකදී නැවත සිහිපත් කළේය.
නාසයට නලයක් දමා හිසට සහ අත්වලට වෙළුම් පටි දමා සිටිනු දක්නට ලැබුණු ස්මිට් මච්ඡාර් (Smit Machchhar), අබුඩාබි හි රෝහල් ඇඳක සිට අගමැතිවරයාගේ සමාජ මාධ්‍ය නාලිකාවල මුදා හරින ලද විනාඩි 10 කට ආසන්න වීඩියෝ පටයක් ඔස්සේ මෝදි මහතා සමඟ ඔහු අදහස් දැක්වීය.
එහිදී තමන් මුහුණ දුන් බියජනක අත්දැකීම විස්තර කරමින් ඔහු කඳුළු පිසදැමුවේය.
“යානය පහතට කඩා වැටෙන බව මම දැන සිටියා… මම බිම වැටී සිටියා. මම මටම කියා ගත්තා දොර තියෙන්නේ එතනමයි, එය විවෘත කරන්න කියා. මම කොහොම හරි ඒක කළා, ඊට පස්සේ පිරිස ඇතුළට ආවා,” ඔහු පැවසීය.
මෙම සිදුවීමේදී ෆ්ලයිඩුබායි ගුවන් යානය කඩා දැමීමේ තැතක් ලෙස සැලකෙන ප්‍රහාරයකින් මච්ඡාර් මහතා ඔහුගේ සහායක නියමුවා අතින් පිහි ඇනුමකට ලක්විය. පුද්ගලයින් 174 දෙනෙකු රැගත් මෙම ජෙට් යානය තත්පර 30 කටත් අඩු කාලයකදී අඩි 14,000 ක් (මීටර් 4,267 ක්) පහතට ඇදී ගියේය.
"මම පසුගිය වසර 17 තිස්සේ ගුවන් යානා පදවනවා, පසුගිය වසර 11 තිස්සේ ප්‍රධාන නියමුවෙකු (captain) ලෙස කටයුතු කරනවා".ඔහු පැවසීය.
මච්ඡාර්ගේ නිර්භීතකම අගය කළ මෝදි මහතා, ඔහුගේ ක්ෂණික බුද්ධිය නිසා මිනිස් ජීවිත බේරුණු අතර ඉන්දීය ගුවන් නියමුවන්ගේ කීර්තිනාමය ද රැකුණු බව පැවසීය.
“දෙවියන් වහන්සේ මාව බේරාගත් බව මම දන්නවා,” මෝදිගේ උපන් ප්‍රාන්තය වන ගුජරාට් හි පදිංචිකරුවෙකු වන සංවේදී වූ මච්ඡාර් පැවසීය.
මෙම භයානක අවස්ථාවේදී තමා හනුමාන් දෙවියන් උදෙසා කෙරෙන හින්දු යාච්ඤාවක් ගායනා කළ බව ඔහු අගමැතිවරයාට පැවසීය.
මච්ඡාර් කොක්පිට් දොර විවෘත කිරීමට සමත් වන විට ඔහු ලෙයින් තෙත්වී බිම වැටී සිටි බව ඊශ්‍රායල අගමැති බෙන්ජමින් නෙතන්යාහුගේ ප්‍රකාශකයෙකු බ්‍රහස්පතින්දා රොයිටර් පුවත්පතට පවසා තිබුණි.
එමඟින් මගීන්ට සහ කාර්ය මණ්ඩලයට කොක්පිට් ඇතුළට පැමිණ සහායක නියමුවා මෙල්ල කිරීමටත්, යානයේ සිටි ෆ්ලයිඩුබායි හි දෙවන ගුවන් නියමු යුගලයට ජෙට් යානයේ පාලනය ගෙන එය සවුදි අරාබියේ තබූක් (Tabuk) වෙත ගොඩබෑස්වීමටත් අවස්ථාව ලැබුණු බවත් වාර්තා විය.
