සටහන – රුවන් නෙළුගොල්ල
අත්අඩංගුවට ගන්නා ලද බොදුබල සේනා සංවිධානයේ ලේකම් ගලගොඩඅත්තේ ඥානසාර හිමි හෙට (05) දක්වා රක්ෂිත බන්ධනාගාරගත කර තිබේ.
ඒ, එහිමියන්ව අද (04) කොළඹ අපරාධ කොට්ඨාශයේ නිලධාරින් විසින් කොළඹ මහෙස්ත්‍රාත් අධිකරණයට ඉදිරිපත් කිරීමෙන් අනතුරුව ය.
එහිමියන්ව හෙට දිනයේදී අභියාචනාධිකරණය හමුවට ඉදිරිපත් කරන ලෙසත් නියම කෙරිණි.
අධිකරණයට අපහාස කිරීමේ චෝදනාවට වරදකරු වී සිරදඬුවම් නියම වී, හිටපු ජනාධිපති මෛත්‍රීපාල සිරිසේන මහතා විසින් ලබාදුන් ජනාධිපති සමාවක් මත නිදහස්ව සිටි ඥානසාර හිමියන්ට එසේ ලැබුණු ජනාධිපති සමාව පසුගියදා ශ්‍රේෂ්ඨාධිකරණය විසින් බලරහිත කරන ලද අතර ඒ අනුව සිරදඬුවම නැවත ක්‍රියාත්මක කිරීම සඳහා එහිමියන්ව අත් අඩංගුවට ගන්නා ලෙස මීට දින කිහිපයකට පෙර වරෙන්තු නිකුත් කර තිබිණි.
ඒ අනුව ඊයේ සවස එහිමියන්ව පිටිගල, ඉහළ හේරැස්ස, ලේනගිරි ආරණ්‍යය සේනාසනයේ සැඟව සිටියදී කොළඹ අපරාධ කොට්ඨාසයේ නිලධාරීන් විසින් අත් අඩංගුවට ගෙන තිබිණි.
