සටහන: සශිකලා මධුෂාණී
ලෝකය(අවුට්බවුන්ඩ් ටුඩේ) ඔක්තෝම්බර් මස 09 : මැලේසියාවට බලපා ඇති විෂ සහිත දුමාරය හේතුවෙන් එරට පාසල් වසා දැමීමට බලධාරීන් පියවර ගෙන තිබේ.
සිංගප්පූරුවේ වායු දූෂණය ද වාර්තාගත මට්ටමකට ඉහළ ගොස් ඇති දුමාරය හේතුවෙන් එළිමහන් ක්‍රියාකාරකම් සීමා කිරීමට ද නිර්දේශ කර ඇත.
කලාපය පුරා පැතිර යන ඝන දුමාරය හේතුවෙන් ජනතාවගේ සෞඛ්‍යයට එල්ල වන බලපෑම් පිළිබඳව දැඩි අවධානයක් යොමුව ඇති අතර විශේෂයෙන්ම ළමුන්, වැඩිහිටියන් සහ ශ්වසන රෝගවලින් පෙළෙන පුද්ගලයන් වායු දූෂණයේ බලපෑමට වැඩි වශයෙන් ගොදුරු වීමේ අවදානමක් පවතී.
කලාපයේ පවතින වියළි කාලගුණික තත්ත්වයන් සහ විශේෂයෙන්ම ඉන්දුනීසියාවේ වනාන්තර සහ පීට් බිම් ගිනිගැනීම්වලින් නිකුත් වන දුමාරය සුළං ප්‍රවාහ සමඟ අසල්වැසි රටවල් වෙත පැතිර යාම අග්නිදිග ආසියානු කලාපයේ වායු දූෂණයට දිගුකාලීනව බලපා ඇති ගැටලුවක් බවට පත්ව තිබේ.
මෙම තත්ත්වය හමුවේ ජනතාවට අනවශ්‍ය ලෙස එළිමහනේ රැඳී සිටීමෙන් වළකින ලෙසත්, අවශ්‍ය අවස්ථාවලදී මුහුණු ආවරණ භාවිත කරන ලෙසත් සෞඛ්‍ය උපදෙස් අනුගමනය කරන ලෙසත් මැලේසියාව සෞඛ්‍ය මාර්ගෝපදේශ නිකුත් කර ඇත.
