කොළඹ LNW:හිටපු ජනාධිපති රනිල් වික්‍රමසිංහගේ ලණුව කා වත්මන් ජනාධිපති අනුර කුමාර දිසානායක මහතා රාජ්‍ය සේවකයන්ගේ වැටුප් වැඩි කිරීමට ගියහොත් රට නැවත බංකොලොත් වන බව හිටපු රාජ්‍ය ඇමති දිළුම් අමුණුගම මහතා පවසයි.
රජයේ සේවකයන්ගේ වැටුප් වැඩි කිරීමට ප්‍රමාණවත් මුදල් මහාභාණ්ඩාගාරය සතුව නොමැති බවයි දිලුම් අමුණුගම මහතා පවසන්නේ.
ඒ අනුව හිටපු පාලකයින් රට ආර්ථික වශයෙන් වට්ටවා බලය ලබා ගැනීමේ ක්‍රියා මාර්ගයෙන් ඉවත් විය යුතු බවයි අමුණුගම මහතා සඳහන් කරන්නේ.
රනිල් වික්‍රමසිංහ මහතාගේ පාලන කාලය තුළ ජනාධිපතිවරණයේ තැපැල් ජන්ද විමසීමට දිනකට පෙර කැබිනට් තීරණයක් මඟින් රජයේ සේවකයින්ගේ වැටුප් වැඩිකරන බව ප්‍රකාශ කළේය.
නමුත් ජනාධිපතිවරණයෙන් ජයගැනීමට වික්‍රමසිංහ මහතාට නොහැකි වූ අතර මෑතකදී ඔහු පැවසුවේ රජයේ සේවකයින්ගේ වැටුප් වැඩිකිරීමට අදාළව තමන් මුදල් වෙන් කර තිබුණු බවයි.
ඒ අනුව වෘත්තීය සමිති නායකයින් කැඳවා වික්‍රමසිංහ මහතා පැවසුවේ එම වැටුප් වැඩිවීම වත්මන් ආණ්ඩුවෙන් ඉල්ලා සිටින ලෙසයි.
එහෙත් ජනාධිපති අනුර කුමාර දිසානායක මහතා පැවසුවේ හිටපු ජනාධිපතිවරයා පවසන්නේ අසත්‍යක් වන අතර ඔහු පවසන පරිදි මුදල් වෙන්කිරීමක් සිදුකර නොමැති බවයි.
කෙසේවෙතත් රජයේ සේවකයින්ගේ වැටුප් වැඩිකිරීම පිළිබඳව රජය අවධානය යොමුකර තිබෙන බවද ජනාධිපතිවරයා පැවසුවේය.
ආශිකා බ්‍රාහ්මණ
