සටහන – රෂිකා හෙන්නායක
කොළඹ (LNW): 2024 වසරේ, බොර තෙල් නැව් තුනක් මිල දී ගැනීම සඳහා වන දිගුකාලීන කොන්ත්‍රාත්තුව සිංගප්පූරු සමාගමක් වෙත ලබාදීමට කැබිනට් මණ්ඩල අනුමැතිය හිමිව ඇත.
ඒ අනුව ලබන වසරේ ජනවාරි 15 වන දින සිට 2024 ජූනි 14 වන දක්වා කාලය තුළ බොර තෙල් නැව් තොග 3ක් 100%ක් ගබඩාගත ටැංකිවලින් නිකුත් කිරීමේ දී ගෙවීමේ ක්‍රමවේදය යටතේ මිලදී ගැනීම වෙනුවෙන් මෙම මිල දී ගැනීම සිදුකෙරෙනු ඇත.
එහිදී, දිගුකාලීන කොන්ත්‍රාත්තුවක් පිරිනැමීම සඳහා ලංසු කැඳවා ඇති අතර, එයට ලංසු දෙකක් ලැබී ඇත. එම ලංසු අමාත්‍ය මණ්ඩලය විසින් පත්කරන ලද විශේෂ ස්ථාවර ප්‍රසම්පාදන කමිටුව විසින් ඉදිරිපත් කර ඇති නිර්දේශ මත පදනම්ව, අදාළ ප්‍රසම්පාදන සිංගප්පූරුවේ M/s Vitol Asia Pte.Ltd සමාගම වෙත පිරිනැමීමට, විදුලිබල හා බලශක්ති අමාත්‍ය කංචන විජේසේකර මහතා ඉදිරිපත් කළ කැබිනට් පත්‍රිකාවට අනුමැතිය හිමිව ඇත.
තවද, 2024 ජනවාරි 15 වන දින සිට 2024 ජූනි 14 වන දින දක්වා කාලය තුළ බොර තෙල් නැව් තොග 3ක් දින 30කින් ගෙවීමේ පදනම මත ණයවර ලිපියක් මඟින් මිල දී ගැනීම සඳහා වූ දිගුකාලීන කොන්ත්‍රාත්තුව සඳහා ද අමාත්‍ය මණ්ඩල අනුමැතිය හිමිව තිබේ.
ඒ සඳහා ද ලංසු 3ක් ලැබී ඇති අතර, එම ලංසු සම්බන්ධයෙන් අමාත්‍ය මණ්ඩලය විසින් පත්කරන ලද විශේෂ ස්ථාවර ප්‍රසම්පාදන කමිටුව විසින් ඉදිරිපත් කර ඇති නිර්දේශය මත පදනම්ව M/s Coral Energy DMCC, UAE සමාගම වෙත පිරිනැමීමට අනුමැතිය හිමිව ඇති බව සඳහන්.
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත??
