ත්‍රස්තවාදය වැළැක්වීමේ පනත යටතේ අත් අඩංගුවට ගෙන රඳවාගෙන සිටින අන්තර් විශ්ව විද්‍යාලයීය ශිෂ්‍ය බලමණ්ඩලයේ කැඳවුම්කරු වසන්ත මුදලිගේ අද (14) තංගල්ල මහේස්ත්‍රාත් අධිකරණයට ඉදිරිපත් කර තිබේ.
ඒ, පසුගියදා ශ්‍රේෂ්ඨාධිකරණය විසින් ලබාදුන් නියෝගය අනුව ය.
එහිදී හඳුනාගැනීමේ පෙරෙට්ටු කිහිපයකට ඉදිරිපත් කළයුතු බව පවසමින් ඔහුගේ මුහුණ ආවරණය කර අධිකරණයට හමුවට ඉදිරිපත් කිරීමට ත්‍රස්ත විමර්ශන ඒකකය කටයුතු කර තිබුණු නමුත් එම පෙරෙට්ටුවලට අදාළ නඩු මොනවාදැයි මහේස්ත්‍රාත්වරයා විමසූ විට එවන් කිසිදු නඩුවක් පිළිබඳ කරුණු ඉදිරිපත් කිරීමට ත්‍රස්ත විමර්ශන ඒකකය අපොහොසත්ව ඇති බව වාර්තා විය.
ඒ අනුව ශ්‍රේෂ්ඨාධිකරණ නියෝගය මත වසන්ත මුදලිගේව මෙසේ මහේස්ත්‍රාත් අධිකරණයට ඉදිරිපත් කළ නමුත් ඔහුව කෙසේ හෝ තවදුරටත් රඳවා තබාගෙන සිටීමේ අරමුණින් යුතුව පොලිසිය කූඨ උපක්‍රම භාවිතා කරමින් සිටින බව ඔහු වෙනුවෙන් පෙනී සිටි නීතීඥවරයා අධිකරණයට කරුණු දක්වමින් ප්‍රකාශ කර තිබුණු අතර එම කරුණ ද නඩු වාර්තාවට ඇතුළත් කරගෙන ඇති බව සඳහන්.
වසන්ත මුදලිගේව නැවත නොවැම්බර් 18 වනදා මහේස්ත්‍රාත්වරයා වෙත ඉදිරිපත් කිරීමට නියම කර ඇති අතර එතෙක් ඔහුව නැවතත් රැඳවුම් භාරයට පත්කර තිබේ.
RN
