පායනා කාලෙදී
රැස් කරපු කෑම ඇති
අපේ අල්ලපු ගෙදර කූඹියා
සංගීත පන්ති යයි
රෑ මැදියමේ පවා
ටිකක් යට ස්වරයකින්
නියම ශ්‍රැතියට පිටින්
පළගැටියාගේ සිංදු
දිගට ප්‍රැක්ට්ස් කරයි
පළගැටියා රෝහලේ
ඇල්කොලික් සිරෝසීස්
දැන් ටිකක් අමාරුයි
නිවුස් කෙල්ලෙක් කියයි
රේඩියෝ එක දිගට
කියයි පළගැටි ගීත
ප්‍රේම ආයාචනා
හදේ සංවේදනා
අපේ නෙත් බර කරයි
කුඹි හඬකින් ඇහෙන
පරණ පළගැටි සිංදු
යම් වෙනත් සෝකයක්
දරාගෙන ගලා එයි
කූඹි පාටියක දී
ඇහෙන පළගැටි ගීත
කූඹි රතු රැළියක දි
මැරෙන පලගැටි ගීත
සිරෝසිස් හදනවද
මට හිතෙයි
තනියෙන් ම පාඩුවේ
මැදියමේ ගී ගැයූ
රැහැයියන් පවා දැන්
අඳයි, බිහිරියි, ගොළුයි
උන්ට
බයයි, සීතයි, තනියි ….
~ ඉසුරු චාමර සෝමවීර
RN
