කොළඹ LNW:සාමාන්‍ය පාරිභෝගිකයාට විදුලි බිල අඩු වුවත් කර්මාන්ත ක්ෂේත්‍රයේ අයට විදුලි බිල අඩු වෙන බවක් අමාත්‍යවරයා සඳහන් නොකළ බව සමස්ත ලංකා කුඩා කර්මාන්තකරුවන්ගේ සංගමයේ ජාතික සංවිධායක නිරුක්ෂ කුමාර මහතා ප්‍රකාශ කරයි.
ඔහු කියා සිටින්නේ නිවාස ආශ්‍රිතව කර්මාන්තවල යෙදෙන පුද්ගලයන්ට විදුලි බිලට සහන ලබා දෙන බව ප්‍රකාශ කළත් කර්මාන්ත කාණ්ඩයේ බිල අඩුවන බවක් අමාත්‍යවරයා සඳහන් නොකළ බවයි
මේ වන විට රුපියල් තිහකට ආසන්න ස්ථාවර ගාස්තුවක් ඉන්ඩස්ට්‍රියල් කාණ්ඩයේ කර්මාන්තකරුවන් විදුලි බල මණ්ඩලයට ගෙවන බවත් මේ පිළිබඳව වැඩි අවධානයක් යොමු කොට මෙය ගැන සඳහනක් නොකර සිටියේ නම් ඒ පිළිබඳව වඩාත් අවධානය යොමු කර එයටද සහන ලබාදෙන ලෙස ඔහු ඉල්ලා සිටියි.
”කර්මාන්තකරුවන් විදියට මේ විදුලි බිල අඩුවීම සම්බන්ධයෙන් අපට ගැටලුවක් තිබෙනවා. කර්මාන්ත ක්ෂේත්‍රයේ නියැලෙන දෙලක්ෂ පනස්දාහක් පමණ කර්මාන්ත මේ වන විටත් විදුලිබිල හේතුවෙන් වැසී තිබෙනවා. කරුණාකර ඒ පිළිබඳ අවධානය යොමු කරන්න. විදුලි බල පනත ඊයේ දිනයේදී සම්මත වුණා. ඒක ඉතාම හොඳ දෙයක්. අපි දැක්කා විදුලිබල මණ්ඩලයට අලුත් ආයෝජකයන් එනකොට මේ වෘත්තීය සමිති මේ පිළිබඳව දැඩි විරෝධයක් දක්වනවා. අපි බලාපොරොත්තු වෙනවා ඉදිරියේදී මෙම විදුලි බල පනත හරහා අලුත් ආයෝජකයෝ ශ්‍රී ලංකාවට පැමිණ විදුලි බිල අඩු කිරීමට යම් දායකත්වයක් ලබා දෙයි කියලා. පනතේ යම් යම් අඩුපාඩු තියෙනවා. එහිදී පාරිභෝගිකයා ආරක්ෂා කිරීම සහ භෞමික අඛණ්ඩතාවේ පිළිබඳව ගැටලු තිබෙනවා. ඒ පිළිබඳවත් අවධානය යොමු කරන්න ඕනේ.” යනුවෙන් සමස්ත ලංකා කුඩා කර්මාන්තකරුවන්ගේ සංගමය වැඩිදුරටත් අවධාරණය කරයි.
ආශිකා බ්‍රාහ්මණ
