රටතුළ හදිසි අවස්ථාවක් ප්‍රකාශයට පත්කර ඇති අවස්ථාවක රටේ සියලු නීති අභිබවා, රෙගුලාසි අභිබවා මහජන ආරක්ෂක පනත ඉදිරියට පැමිණෙන බව ජ්‍යෙෂ්ට නීතිවේදී, ආචාර්ය ප්‍රතිභා මහානාමහේවා මහතා පවසනවා.
කෙසේ නමුත් 1978 ව්‍යවස්ථාවේ මූලික මිනිස් අයිතිවාසිකම් තුන්වැනි පරිච්ඡේදය අභිබවා යාමේ හැකියාවක් මහජන ආරක්ෂක පනතට නොමැති බවයි අද කොළඹදී පැවති මාධ්‍ය හමුවක් අමතමින් ප්‍රතිභා මහානාමහේවා මහතා සඳහන් කළේ. ඒ අනුව හදිසි නීතිය පනවා ඇති අවස්ථාවක වුවද ජනතාවගේ භාෂණයේ අයිතිය, රැස්වීමේ අයිතිය, විරෝධය දැක්වීමේ අයිතිය ආරක්ෂා වන බවද ඔහු සඳහන් කරනවා.
හදිසි අවස්ථා රෙගුලාසි ක්‍රියාත්මකව තිබියදී ශ්‍රී ලංකා පොලීසියට සහ යුද හමුදාවට කිසිදු චෝදනාවකින් තොරව පුද්ගලයන් අත්අඩංගුවට ගැනීමේ හැකියාව ලැබෙන බවද මහානාමහේවා මහතා පවසනවා.
කෙසේ නමුත් චෝදනාවකින් තොවර, වරෙන්තුවක් නොමැතිව අත්අඩංගුවට ගන්නා පුද්ගලයන්ට වදහිංසාවට ලක්වීමෙන් වැළකීමේ අයිතිය ආණ්ඩුක්‍රම ව්‍යවස්ථාවෙන් ආරක්ෂා කර ඇති බවද ඔහු සඳහන් කරයි.
UN
