කොළඹ LNW:හිටපු රාජ්‍ය අමාත්‍ය ලොහාන් රත්වත්තේ මහතාගේ බිරිඳ වන රෂි ප්‍රභා රත්වත්තේ මහත්මිය ලබන 07 වනදා තෙක් රක්ෂිත බන්ධනාගාර ගත කිරීමට ගංගොඩවිල අධිකරණය නියෝග කර තිබේ.
ඇයව මෙලෙස රක්ෂිත බන්ධනාගාර ගතවන්නේ අංක තහඩු නොමැති මෝටර් රථයක් මිරිහානේ පිහිටි ඇයගේ නිවසින් සොයා ගැනීමේ සිද්ධියට අදාළවයි.
එම සිද්ධිය සම්බන්ධයෙන් අවස්ථා කිහිපයකදී මිරිහාන පොලීසියට හමුවේ ප්‍රකාශයක් ලබාදෙන ලෙසට ඇයට දැනුම් දීම් සිදුකර තිබූ අතර ඒ අනුව ඇය අද දිනයේදී අධිකරණය හමුවේ පෙනී සිට ඇති අතර එහිදී ඇයව අත්අඩංගුවට ගෙන තිබේ.
කෙසේවෙතත් රත්වත්තේ මහත්මිය වෙනුවෙන් පෙනී සිටි නීතීඥවරයා අධිකරණය හමුවේ කියා සිටියේ තම සේවාදායිකාව වාහන සිද්ධියට කිසිඳු සම්බන්ධයක් නොමැති බවයි.
එහෙත් අධිකරණය කරුණු ප්‍රතික්ෂේප කරමින් සැකකාරිය රක්ෂිත බන්ධනාගාර ගත කිරීමට නියෝග කර ඇත.
එම සිද්ධිය සම්බන්ධයෙන් මීට පෙර අත්අඩංගුවට ගෙන රක්ෂිත බන්ධනාගාර ගත කෙරුණ ලොහාන් රත්වත්තේ මහතා අසනීප තත්ත්වය හේතුවෙන් මේ වන විට කොළඹ ජාතික රෝහලේ ප්‍රතිකාර ලබමින් සිටියි.
ආශිකා බ්‍රාහ්මණ
