පොලිස් භාරයේ සිටි තරුණයකු මියයාමේ සිද්ධියට අදාළව වැඩතහනමකට ලක්කර සිටි හෝමාගම පොලිස් ස්ථානයේ අපරාධ අංශයේ ස්ථානාධිපතිවරයාව අත් අඩංගුවට ගෙන තිබේ.
බස්නාහිර දකුණ අපරාධ කොට්ඨාසය මගින් ඊයේ (28) සවස ඔහුව අත් අඩංගුවට ගෙන ඇත.
මත්ද්‍රව්‍ය චෝදනාවක් මත අත් අඩංගුවට ගෙන හෝමාගම පොලිස් ස්ථානයේ සිරමැදිරියේ රඳවාගෙන සිටි 29 හැවිරිදි තරුණයකු පසුගියදා මියගොස් තිබුණු අතර ඔහුගේ ඥාතීන් දැඩි ලෙස චෝදනා කළේ පොලිස් නිලධාරීන් පිරිසක් විසින් කළ පහරදීම් හේතුවෙන් එම තරුණයා මියගොස් ඇති බවටය.
මේ තරුණයා අසනීප තත්වයක් හේතුවෙන් මරණයට පත්ව ඇති බවක් මුලින් පැවසූ පොලීසිය පසුව එල්ල වූ විරෝධතා හමුවේ හෝමාගම පොලිස් ස්ථානයේ අපරාධ අංශයේ ස්ථානාධිපතිවරයා ඇතුළු තිදෙනෙකුගේ වැඩතහනම් කළේය.
මරණයට පත් තරුණයාගේ පවුලේ ඥාතීන් සහ සිවිල් සංවිධාන කිහිපයක් ඊයේ දිනයේදී හෝමාගම මහේස්ත්‍රාත් අධිකරණයට මෝසමක් ඉදිරිපත් කර තිබූ අතර එය විභාගයට ගත් හෝමාගම මහේස්ත්‍රාත් රජින්දා ජයසූරිය, සිද්ධියට අදාළ විමර්ශන කඩිනම් කර සැකකරුවන් අත් අඩංගුවට ගෙන අධිකරණයට ඉදිරිපත් කරන නියෝග කර තිබිණි.
