රෂිකා හෙන්නායක නොවැම්බර් 13, කොළඹ (LNW):
අද (13) පස්වරුවේ, උඩරට දුම්රිය මාර්ගයේ ඔහිය ඉදල්ගස්හින්න දුම්රිය ස්ථාන අතර දුම්රිය මාර්ගයට විශාල ගල් කඩා වැටීමෙන් කොළඹ කොටුව සිට බදුල්ල බලා ධාවනය වෙමින් තිබූ පොඩිමැණිකේ දුම්රිය එම ස්ථානයේ සිරවී නවතා තබා ඇති බව නාවලපිටිය දුම්රිය පාලක මැදිරිය පවසයි.
දුම්රිය බලධාරීන් පවසන්නේ, පවතින වර්ෂාවත් සමඟ මෙසේ උඩරට දුම්රිය මාර්ගයේ ඔහිය ඉදල්ගස්හින්න දුම්රිය ස්ථාන අතර දුම්රිය මාර්ගයට ගල් කඩා වැටී ඇති අතර, එම අවස්ථාවේ එම ස්ථානය අසලින් ධාවනය වෙමින් තිබූ කොළඹ කොටුව සිට බදුල්ල බලා පැමිණි අංක 1005 දරණ පොඩිමැණිකේ දුම්රිය දුම්රිය රියදුරුගේ දක්ෂතාව මත නවතා ගෙන ඇති බවයි.
බදුල්ල සිට මහනුවර බලා ධාවනය වෙමින් තිබූ අංක 1596 දරන භාණ්ඩ ප්‍රවාහන මිශ්‍ර දුම්රිය දැනට ඉදල්ගස්හින්න දුම්රිය ස්ථානයේ නවතා තබා ඇති බවද වාර්තා වේ. නාවලපිටිය දුම්රිය පාලක මැදිරිය වැඩිදුරටත් සඳහන් කර සිටියේ , දුම්රිය මාර්ගයට කඩා වැටී ඇති ගල් ඉවත් කිරීමට කටයුතු සිදු කරන බවයි.
