ආන්ඩු බිඳවැටෙනවා.. අළුත් ආන්ඩු පත්වෙනවා.. නමුත් මේ දෘෂ්‍යමානයට යටින් මේ කුඩා කොදෙව්ව ඇත්තටම පාලනය කරන්නේ කලාපයේ බලවතුන්ගේ අදෘෂ්‍යමාන හස්තයන් විසින්..
මහින්ද චීනෙන් ණය අරන් හම්බන්තොට පුරාම අලි කැලෑ මැද්දෙන් හයිවේ හදනකොට, හම්බන්තොට වරායවල් හදනකොට, ගුවන්තොටුපොලවල් හදනකොට අපි හිතුවෙ මහින්දගේ බයි ගතිය නිසා මහින්ද අගනුවර ගමට ගෙනියන්ට හදනව කියලා.. නමුත් එක තැනකදි ගත්ත ණය ගෙවාගන්ට බැරිව හම්බන්තොට වරාය චීනෙට සින්නවෙනකොට තමා අපිටත් වැඩේ තේරෙන්ට ගත්තෙ…
කලාපීය බල අරගලය තුල තමන් සක්‍රීය කරමින් යන මුහුදු මාර්ගයේ පිහිටි හම්බන්තොට අවට ප්‍රදේශය ස්වකීය තනි අණසකට ගැනීම චීන පාලන තන්ත්‍රයේ අභිප්‍රායයි….
මහින්දගේ හම්බන්තොට වරායේ සහ ගුවන්තොටුපොලේ සිට අනුරගේ ආන්ඩුව තුල අත්සන් කෙරුන බිලියන 3.7 ක ඛනිජ තෙල් පිරිපහදුව දක්වාම දිග හැරෙන්නේ උක්ත චීන පාලන තන්ත්‍රයේ බලදේශපාලන සැලැස්මයි..
මහින්ද හම්බන්තොට වරාය හැදුවේ නැත්නම්, හම්බන්තොට දැවැන්ත යටිතල පහසුකම් ජාලයක් හැදුවේ නැත්නම් අද හම්බන්තොට ඛනිජ තෙල් පිරිපහදුවකට අවශ්‍ය පසුබිම නෑ.. එබැවින් මේ අති දැවැන්ත ඛනිජ තෙල් පිරිපහදුව යනු මහින්දගේ හම්බන්තොට වරායේම ඊළඟ දිගුවයි.
බංකොලොත් බව නිසාම ලංකාව දිහා විදේශ ආයෝජකයෝ හැරිලවත් බලන්නෙ නැති පසුබිම තුල මේ ඛනිජ තෙල් පිරිපහදුව ලංකාවේ මහා ජයග්‍රහණයක් විදියට කෙනෙකුට පේන්න පුලුවන් … හැබැයි බංකොලොත් වෙන්ට බලපාපු ස්ටක් වෙච්ච ණය වලින් වැඩි හරියක් ඉහළ පොලියකට වරායවල්, ගුවන්තොටුපොලවල් හදන්ට ගත්ත චීන ණය.. ඊළඟට රට බංකොලොත් වෙලා ගත්ත ණය ප්‍රතිව්‍යුහගත කරන්ට කතාකලාම ඒකට ලෝකයම කැමති වෙද්දි ඒකට පස්ස ගහපු එකම එකත් චීනා..
ලංකාව ණය කරෙත් චීන්නු, ඊළඟට තෙල් පිරිපහදුවලට භූමිය ඩැහැගෙන පිහිට වෙන්න එන්නෙත් චීන්නු.. (රටරටවල මහ ඇත්තන්ගේ පතල මහා කරුණාව)
ඇත්තටම මේ චීන ඛනිජ තෙල් පිරිපහදුව චීන බලදේශපාලනය සිතියමේම කොටසක් මිසක් ඒකෙන් අපට ලැබෙන මගුලකුත් නෑ..
ඒ පිරිපහදුව අපිට අයිති නෑ.. ඒක අයිති චීනෙට.. මේ පිරිපහදුව හදන්ට අවශ්‍ය යන්ත්‍රසූත්‍ර, අමුද්‍රව්‍ය , පුහුණු ශ්‍රමය ඔක්කොම ගේන්නෙත් චීනෙන්, ඒනිසා මේ බිලියන 3.7 න් ලොකු හරියක් ලංකා භූමියට එන්නෙවත් නෑ..
මෙහෙට හම්බවෙන්නේ වැටමායිම් සකස් කිරීම කානු පද්ධති සකස් කිරීම වගේ උප කොන්ත්‍රාත් පාන් කුඩු කෑලි විතරයි ..
තව ඕන නම් කාලයක් යනකොට අපිට මහ විශාල ඛනිජ තෙල් පිරිපහදුවෙන් වියෝජනය වන විෂ වායුවෙන් හා අපද්‍රව්‍ය වලින් සදහටම දූෂණය වෙච්ච පරිසරයක් හම්බවෙයි..
මේ බිලියන ගානක ව්‍යාපෘතිය ෂී ජින්පින් පාලන තන්ත්‍රයේ ජයග්‍රහණයක් මිසක් ලංකාවේ ජයග්‍රහණයක් නෙමේ ….
~ ප්‍රියශාන්ත රාජපක්ෂ
