සටහන – රුවන් නෙළුගොල්ල
මෑත කාලයේ සිදුවූ වෙඩිතැබීම් ඇතුළු අපරාධ සම්බන්ධයෙන් අත් අඩංගුවට ගෙන ඇති යුද හමුදා සාමාජිකයින් ඇතුළු ආරක්ෂක අංශ නිලධාරීන් සම්බන්ධයෙන් මහජන ආරක්ෂක අමාත්‍ය ආනන්ද විජේපාල මහතා අනාවරණයක් සිදුකළේය.
“පසුගිය සැප්තැම්බර් 23 වනදා සිට මේ දක්වා සිදුවූ අපරාධ ගැන අවධානය යොමු කළාම සේවයේ සිටියදීම යුද හමුදාවේ එක්කෙනෙක් දෙන්නෙක් මේ කටයුතුවල නිරත වෙනවා. මේ දින කිහිපය තුළ යුද හමුදා මේජර්වරයෙක් අත්අඩංගුවට ගෙන තිබෙනවා. යුද හමුදාවේ සෙසු නිලයන් 6 දෙනෙක් අත්අඩංගුවට අරගෙන තිබෙනවා.පොලිස් නිලධාරියෙක් අත්අඩංගුවට අරගෙන තිබෙනවා. සිවිල් ආරක්ෂක නිලධාරියෙක් අත්අඩංගුවට අරගෙන තිබෙනවා. සංවිධානාත්ම අපරාධකරුවන් 15ක් සහ අපරාධවලට අනුබලදීම සම්බන්ධයෙන් තවත් 15ක් අත්අඩංගුවට අරගෙන තිබෙනවා. ඒ විදියට තමයි මේ අපරාධ සඳහා සම්බන්ධවෙලා තියෙන්නේ”
මහජන ආරක්ෂක අමාත්‍යවරයා මේ බව පැවසුවේ අද (ජනවාරි 21) පාර්ලිමේන්තුවේදී කරුණු දක්වමිනි.
