”පින්තූරයේ සිටින අපේ තාත්තා දුටුවොත් පහත අංකයට දැනුම් දෙන්න. අවසන් වරට ඇඳ සිටියේ නිල් කමිසයක් සහ බතික් සරමකි.”
සිහිවිය
මෑතක ගත් පින්තූරයක් නොමැති බව.
පසුවුන වසර ගනනට
මුහුනේ ඉරි ඇඳී ඇත
කම්මුල් දියවී
හකු ඇට නෙරා ඇත.
කලකින් රැවුළ කපා නැත
දිනපතා සෝදන හෙයින්
සරම් කමිස දියවී ඇත.
ටෙලිවිෂනය ඉදිරිපස අසුන
කිළිටි වී
කිඳා බැස ඇත.
වදනක් දෙකක් හුවමාරු වෙනු මිස
මෑතක අප’තර ඇසුරක් තිබී නැත.
එහෙයින් මීට බොහෝ කලකට පෙර
තාත්තා නැතිවී ඇත.
ඒ බව හරියටම
වැටහුණේ අදය.
කොහේ කොතැනක හෝ
සතුටින් සිටිනවා විය හැකිය.
හතරමං හන්දියක
සිඟමන් යදිනවා විය හැකිය.
මේ ෆොටෝ එකේ ඉන්නා තාත්තා
නැවත සොයාගත යුතුව ඇත.
එහෙයින්
ඔබ ඔහු දුටුවහොත්
වහා දැන්විය යුතුය.
ගෙදර එන්නට බැහැය කිව්වත්
ආපසු ගෙනා යුතුය.
~ වර්ණ රසිකා ගුණවර්ධන
