රට තුළ සහල් හිඟයක් ඇති අතර මෙම වසරේදී විශාල ප්‍රමාණයක් සහල් ආනයනය කිරීමේ අවශ්‍යතාවක් ඇති බව කෘෂිකර්ම අමාත්‍ය මහින්ද අමරවීර මහතා පවසයි.
අද (31) පැවති කැබිනට් තීරණ දැනුම් දීමේ මාධ්‍ය හමුවේදීයි අමාත්‍යවරයා මේ බව සඳහන් කළේ.
“සහල්වල හිඟයක් තියෙනවා. දැනට වෙළෙඳ ඇමතිතුමා සහල් ආනයනය කරන්න කටයුතු කරනවා. මෙම වර්ෂයට විශාල ප්‍රමාණයේ සහල් ගෙන ඒමේ අවශ්‍යතාවයක් තියෙනවා” යනුවෙනුයි අමාත්‍යවරයා එහිදී පැවසුවේ.
කෙසේ වෙතත් ලබන වසරේ සිට සහල් ආනයනය කිරීම නවතා මෙරටට අවශ්‍ය සහල් රට තුළ නිෂ්පාදනය කිරීමට අවශ්‍ය සැලැසුම මේ වන විටත් සකස් කරමින් සිටින බවයි අමරවීර මහතා කියාසිටියේ.
මේ වන විටත් සහල් මෙට්‍රික්ටොන් 338,000ක් ආනයන කර ඇති බවද අමාත්‍යවරයා සඳහන් කරන ලදී.
මේ අතර වී අලෙවි මණ්ඩලය සතුව දැනට ඇති මෙට්‍රික් ටොන් 40,000ක ප්‍රමාණයෙන් සහල් ලබා ගෙන එය ස.තො.ස. සහ සුපිරි වෙළෙඳසල් හරහා ලබා දීමට කටයුතු කරන බවයි අමරවීර මහතා ප්‍රකාශ කළේ.
ASK
