සටහන – පුලී
සැප්තැම්බර් 13, කොළඹ (LNW): මීට දින කිහිපයකට පෙර උතුරු කැරොලිනාවේ චාලට් හි සැහැල්ලු දුම්රියකදී තරුණියක් දරුණු ලෙස ඝාතනය කිරීමේ සිද්ධියේ සැකකරු දැන් ෆෙඩරල් චෝදනාවකට මුහුණ දී සිටින අතර, ඇය ආරක්ෂාව පතා පැමිණි රට තුළ ජාතික ආරක්ෂාව ගැන විශාල පැනයක් සමාජයට යොමුව තිබේ.
රුසියාව සමඟ යුද්ධයෙන් බැට කා ඉන් සහනයක් පතා අයිරිනා සරුට්ස්කා 2022 දී ඇගේ මව, සහෝදරිය සහ සහෝදරයා සමඟ යුක්රේනයෙන් ගොස් එක්සත් ජනපදයෙහි පදිංචිව සිටින්නට විය.
නමුත් අගෝස්තු 22 වන දින රාත්රියේ, ඇය ඉක්මනින් නිවසට පැමිණෙන බව පවසමින් ඇගේ පෙම්වතාට කෙටි පණිවිඩයක් යැවූ මොහොතේ සිට, දුම්රියේ ඇගේ පිටුපස වාඩි වී සිටි මිනිසෙක් ඇගේ උගුරට තුන් වතාවක් පිහියෙන් ඇන ඇයගේ ජීවිතය බිලිගත් වේල දක්වා සිදුවීම එක් ඇසිල්ලකින් සිදු වූවකි.
සැකකරු වන 34 හැවිරිදි ඩෙකාර්ලොස් බ්රවුන්ට පළමු මට්ටමේ මිනීමැරුම් චෝදනාවක් සහ මහා පරිමාණ පොදු ප්රවාහන පද්ධතියක මරණයට හේතු වන ක්රියාවක් සිදු කිරීම සම්බන්ධයෙන් ෆෙඩරල් චෝදනාවක් එල්ල වී තිබේ.
ෆෙඩරල් චෝදනාවට අනුව මරණ දඬුවම පැනවීමේ හැකියාව මේ සමඟ පැමිණෙන අතර ඊට එක්සත් ජනපද ජනාධිපති ඩොනල්ඩ් ට්රම්ප් ද සිය අප්රසාදය ද පළ කර තිබිණි. නඩු පවරන්නන් තවමත් විමර්ශනය කරමින් සිටින බව උතුරු කැරොලිනාවේ බටහිර දිස්ත්රික්කය සඳහා වන එක්සත් ජනපද නීතිඥ රස් ෆර්ගියුසන් වැඩිදුරටත් පැවසීය.
“සාමය සහ ආරක්ෂාව පතා ඇමරිකාවට පැමිණි යුක්රේනයේ සිට රූමත් තරුණියක් ඉතා දරුණු ලෙස මරා දැමූ සත්වයාට ‘ඉක්මන්’ නඩු විභාගයක් ලබා දී මරණ දඬුවම පමණක් ලබා දිය යුතුය. වෙනත් විකල්පයක් තිබිය නොහැක!!!” ට්රම්ප් මෙසේ සටහනක් නිකුත් කරමින් කියා සිටියේය.
