සටහන – රුවන් නෙළුගොල්ල
පහළ කඩුගන්නාව ගනේතැන්න ප්‍රදේශයේ අද (22) පෙරවරුවේ සිදුවූ නායයෑමෙන් විපතට පත්වූවන් මුදා ගැනීමේ මෙහෙයුම් අවසන් කර තිබේ.
මෙම ඛේදවාචකයෙන් මියගිය සංඛ්‍යාව 6 දෙනෙකි. සිද්ධියෙන් තුවාල ලැබූ 4 දෙනෙකු මාවනැල්ල මූලික රෝහලේ ප්‍රතිකාර ලබමින් සිටිති.
යුද හමුදාව, පොලීසිය ඇතුළු ආරක්ෂක අංශත් ආපදා කළමනාකරණ සහන සේවා කණ්ඩායම් සහ ප්‍රදේශවාසීන් එක්ව සුන්බුන් අතර සිරවී සිටි පුද්ගලයින් මුදවා ගැනීමේ දැවැන්ත මෙහෙයුම සිදුකළහ.
අධික වර්ෂාපතනය හේතුවෙන් අදාළ ප්‍රදේශයේ පවතින අනතුරුදායක තත්වය තුළ නුවර – කොළඹ මාර්ගය පහළ කඩුගන්නාව, ගනේතැන්න ප්‍රදේශයෙන් හෙට (23) පස්වරුව දක්වාම වසා තැබෙන බව කෑගල්ල දිස්ත්‍රික් ලේකම්වරයා නිවේදනය කර ඇත.
