සටහන: සශිකලා මධුෂාණි
ජූලි මස 25: ලෝකය(අවුට්බවුන්ඩ් ටුඩේ): ප්රංශයේ සහ ස්පාඤ්ඤයේ පැතිර යන දැවැන්ත ලැව්ගිනි හේතුවෙන් පුද්ගලයින් 220,000කට අධික පිරිසක් ආරක්ෂිත ස්ථාන වෙත ඉවත් කර ඇති අතර, තවත් දහස් සංඛ්යාත පිරිසක් නිවෙස් තුළම රැඳී සිටින ලෙස (lockdown) බලධාරීන් උපදෙස් ලබා දී තිබේ.
ප්රංශයේ නිරිතදිග අත්ලාන්තික් වෙරළ තීරයේ පිහිටි කැප් ෆෙරෙට් (Cap Ferret) අර්ධද්වීපයේ හෙක්ටයාර 19,000කට (අක්කර 47,000කට) අධික වනාන්තර ප්රමාණයක් විනාශ කරමින් පැතිර යන “දැඩි සහ අනාවැකි කිව නොහැකි” ලැව්ගින්න හේතුවෙන් එම ප්රදේශයේ ජනතාව ගම්මාන වශයෙන් ඉවත් කිරීමට බලධාරීන් පියවර ගෙන ඇත.
මේ අතර, ස්පාඤ්ඤයේ අගනුවර වන මැඩ්රිඩ් ආසන්නයේ ඇති වූ විශාල ලැව්ගිනි දෙකක් එකිනෙකට සම්බන්ධ වීමේ අවදානමක් සහ තවත් ගින්නක් ඊට එක්වීමේ හැකියාව මතුවීමත් සමඟ ස්පාඤ්ඤ රජය සිය ඉතිහාසයේ පළමු වරට ලැව්ගින්නක් සම්බන්ධයෙන් ජාතික හදිසි තත්ත්වයක් ප්රකාශයට පත් කර තිබේ.
දකුණු යුරෝපය පුරා පවතින අධික උෂ්ණත්වය, දැඩි වියළි කාලගුණය සහ තද සුළං හේතුවෙන් ගිනි වේගයෙන් වනාන්තර, කෘෂිකාර්මික ඉඩම් සහ ජනාවාස කරා පැතිර යමින් පවතින බව වාර්තා වේ.
ලැව්ගිනි මැඩපැවැත්වීම සඳහා ගිනි නිවන භටයන් දහස් ගණනක්, ගුවන් යානා සහ හෙලිකොප්ටර් යානා යොදවා අඛණ්ඩ මෙහෙයුම් ක්රියාත්මක කරමින් සිටියද, අයහපත් කාලගුණික තත්ත්වයන් හේතුවෙන් මෙහෙයුම් දැඩි අභියෝගයකට මුහුණ දී ඇත.
මේ වන විට ප්රදේශ රැසක මාර්ග වසා දමා ඇති අතර ප්රවාහන සේවාද අත්හිටුවා තිබේ. එමෙන්ම විශාල වනාන්තර ප්රදේශ, නිවාස සහ වෙනත් දේපළ රැසක්ද ගින්නෙන් විනාශ වී ඇත.
කාලගුණ විද්යාඥයන් අනතුරු අඟවන්නේ පවතින දැඩි වියළි කාලගුණය සහ අධික උෂ්ණත්වය ඉදිරි දින කිහිපය තුළද පැවතිය හැකි බැවින් ලැව්ගිනි තත්ත්වය තවදුරටත් බරපතල වීමේ අවදානමක් පවතින බවයි.
