සටහන – පුලී
අගෝස්තු 13, LNW (කොළඹ): සූර්යයා සඳුගේ සෙවණැල්ලෙන් මැකී යමින් අහස අඳුරු වූ ඒ අතිවිශේෂ මොහොතේ, ස්පාඤ්ඤ ඔලිම්පික් ස්කේට්බෝඩ් ක්‍රීඩක ඩැනී ලියොන් අහසට පැන කළ විස්මිත ක්‍රීඩා දස්කමක් මේ වන විට ලොව පුරා අවධානය දිනාගෙන තිබේ.
ලියොන් සිය ස්කේට්බෝඩ් පිම්ම නිවැරදිවම සැලසුම් කර තිබුණේ සඳ සූර්යයා ඉදිරියෙන් ගමන් කරමින් සූර්යග්‍රහණය ඇතිවන මොහොත සමඟ සමපාත වන ආකාරයටය. අහසේ සූර්යයා අඳුරු වෙමින් තිබියදී ඔහු කළ එම දර්ශනීය පිම්ම කැමරාවට හසු වූයේ සිනමා දර්ශනයක් බඳු අතිවිශිෂ්ට රූපයක් ලෙසිනි.
මෙම විශේෂ අවස්ථාව සමාජ මාධ්‍ය ඔස්සේ බෙදාගත් ලියොන්, එය තම ජීවිතයේ කළ “විශිෂ්ටතම දස්කම” ලෙස හැඳින්වීය.
එක් මොහොතකදී විශ්වයේ දැවැන්ත නාට්‍යයක් මෙන් සූර්යයා සහ සඳ එකිනෙකා හමුවෙද්දී, පොළොවේ සිටි මිනිසෙකු තම ස්කේට්බෝඩ් පුවරුව මත අහසට නැගීම මෙම සිදුවීම තවත් අමතක නොවන දර්ශනයක් බවට පත් කළේය.
මෙම සම්පූර්ණ සූර්යග්‍රහණය පැය කිහිපයක් පුරා දිගහැරුණු අතර, සඳ පෘථිවිය සහ සූර්යයා අතරට පැමිණීමත් සමඟ එහි පටු සෙවණැල්ල ග්‍රීන්ලන්තය, අයිස්ලන්තය, උතුරු රුසියාව, ස්පාඤ්ඤය සහ පෘතුගාලයේ කුඩා ප්‍රදේශයක් හරහා ගමන් කරන්නට විය.
සම්පූර්ණ සූර්යග්‍රහණය දැකගත හැකි ප්‍රදේශවල ජනතාවට මොහොතකට සූර්යයා සම්පූර්ණයෙන්ම සඳුගෙන් වැසී යන දුර්ලභ දසුනක් දැකගත හැකි වූ අතර, යුරෝපයේ විශාල ප්‍රදේශ, වයඹදිග අප්‍රිකාව සහ උතුරු ඇමරිකාවේ ඊසානදිග ප්‍රදේශ කිහිපයක ජනතාවට එය අර්ධ සූර්යග්‍රහණයක් ලෙස නිරීක්ෂණය කිරීමට හැකි විය.
මෙය 1999 වසරෙන් පසු යුරෝපීය මහද්වීපයේ ප්‍රධාන භූමි ප්‍රදේශයකින් දැකගත හැකි වූ පළමු සම්පූර්ණ සූර්යග්‍රහණය වීමද විශේෂත්වයකි. ඒ අනුව වසර 27කට පසු යුරෝපයට නැවතත් දුර්ලභ අහස් දර්ශනයක් උදා විය.
එහෙත් මිලියන ගණනක් දෙනා අහස දෙස බලා සිටි ඒ මහා විශ්වීය මොහොතේ, ඩැනී ලියොන් බලා සිටියේ අහස දෙස පමණක් නොවේ. ඔහු තම ස්කේට්බෝඩ් පුවරුව මතට නැගී, සඳෙහි සෙවණැල්ල සමඟ තම පිම්ම එකම මොහොතකට ගැළපූවේය.
විශ්වය තමන්ගේ දර්ශනය සූදානම් කළ මොහොතක, ඔහු තමන්ගේම දස්කම ඊට එක් කළේය.
