රෂිකා හෙන්නායක අගෝස්තු 17 , කොළඹ LNW :
ඇමරිකානු ඩොලර් බිලියන 1ක පමණ මුදලක් නීතිවිරෝධී ලෙස ශ්‍රී ලංකාවේ සිට විදේශ රටවලට යැවීමේ ජාවාරමක් සම්බන්ධයෙන් ප්‍රමුඛ පෙළේ පෞද්ගලික බැංකු හතරක කළමනාකරුවන් සිව්දෙනෙකු අත්අඩංගුවට ගෙන තිබේ.
අපරාධ පරීක්ෂණ දෙපාර්තමේන්තුවේ (CID) මූල්‍ය අපරාධ විමර්ශන කොට්ඨාසය (FCID) විසින් මෙම අත්අඩංගුවට ගැනීම් සිදු කරන ලදී.
මෙම බැංකු කළමනාකරුවන් සිව්දෙනා අදාළ පෞද්ගලික බැංකු පරිශ්‍රයන් තුළදීම අත්අඩංගුවට ගෙන ඇති බව වාර්තා වේ.
මෙවැනි සිද්ධියක් සම්බන්ධයෙන් ශ්‍රී ලංකාව තුළ බැංකු කළමනාකරුවන් අත්අඩංගුවට ගත් පළමු අවස්ථාව මෙය බව පොලිසිය පවසයි.
මෙම ජාවාරම පිටුපස සිටින බවට සැක කෙරෙන ප්‍රධාන පුද්ගලයා විසින් අදාළ බැංකු නිලධාරීන් සිව්දෙනාට සතිපතා මුදල් ගෙවා ඇති බව විමර්ශනවලදී අනාවරණය වී තිබේ.
වාර්තාවලට අනුව, එම නිලධාරීන්ට සතියකට රුපියල් 30,000, රුපියල් 50,000 සහ රුපියල් 100,000 බැගින් මුදල් ගෙවා ඇත.
අත්අඩංගුවට ගත් බැංකු කළමනාකරුවන් සිව්දෙනාගෙන් එක් අයෙකුට එක් අවස්ථාවකදී රුපියල් මිලියනයක පමණ මුදලක් ලැබී ඇති බවද විමර්ශකයින් විසින් අනාවරණය කරගෙන තිබේ.
සිද්ධිය සම්බන්ධයෙන් වැඩිදුර විමර්ශන මූල්‍ය අපරාධ විමර්ශන කොට්ඨාසය (FCID) විසින් සිදු කරනු ලබයි.
