ආශිකා බ්රාහ්මණ
කොළඹ LNW:ශ්රී ලංකාවේ සහ ඉන්දුනීසියාවේ ශ්රම බලකායන් හා කම්කරු තත්ත්වයන් සම්බන්ධ ශක්තීන් සහ අභියෝග පිළිබඳව මෙන්ම දෙරටේ කම්කරු ආරක්ෂණ හා සමාජ ආරක්ෂණ පද්ධති පිළිබඳව ඉන්දුනීසියාවේ නිල සංචාරයක නිරත කම්කරු අමාත්ය සහ මුදල් හා ක්රම සම්පාදන නියෝජ්ය අමාත්ය ආචාර්ය අනිල් ජයන්ත ප්රනාන්දු මහතා ඉන්දුනීසියානු කම්කරු අමාත්ය මහාචාර්ය යසියර්ලි මහතා සාකච්ජාවක නිරත වී තිබේ.
ජකර්තාහි කම්කරු අමාත්යාංශයේදී එම ද්විපාර්ශ්වික සාකච්ජාව සිදුකර තිබේ.
එම ක්ෂේත්රවල අත්දැකීම්, දැනුම සහ යහපත් පරිචයන් හුවමාරු කර ගැනීමේ වැදගත්කමද දෙපාර්ශ්වය විසින් අවධාරණය කර තිබෙන අතර කම්කරු ක්ෂේත්රයේ ද්විපාර්ශ්වික සහයෝගීතාව තවදුරටත් ශක්තිමත් කිරීම කෙරෙහි විශේෂ අවධානය යොමු වී ඇත.
දෙරටේ අදාළ ආයතන අතර වඩාත් සමීප සම්බන්ධතාවක් ඇති කර ගැනීම සඳහා ආයතනික සහයෝගීතා රාමුවක් ස්ථාපිත කිරීමේ වැදගත්කම පිළිබඳව දෙපාර්ශ්වය එකඟතාව පළ කර තිබේ.
එම සහයෝගීතා රාමුව මඟින් ශ්රී ලංකාව සහ ඉන්දුනීසියාව අතර සම්බන්ධතාව තවදුරටත් ශක්තිමත් කිරීමටත්, ජනතාව අතර සබඳතා වර්ධනය කිරීමටත්, කම්කරු ක්ෂේත්රයේ දෙරටටම වැදගත් වන කරුණු සම්බන්ධයෙන් අඛණ්ඩ සහයෝගීතාව සඳහා ශක්තිමත් පදනමක් සකස් කිරීමටත් හැකි වනු ඇතැයි අපේක්ෂා කරයි.
දෙරට අතර වර්ධනය වෙමින් පවතින ශ්රම සංචලනය සැලකිල්ලට ගනිමින්, මිනිස් ජාවාරම, මිනිස් ජාවාරම් සහ සංක්රමණ නීති උල්ලංඝනය කිරීම් වැනි අභියෝගවලට මුහුණදීම සඳහා සමීප සහයෝගීතාවක් සහ සම්බන්ධීකරණ යාන්ත්රණයක් ස්ථාපිත කිරීමේ අවශ්යතාවද දෙපාර්ශ්වය අවධාරණය කර තිබෙන අතර විදේශගත ශ්රමිකයන්ගේ අයිතිවාසිකම් සහ ආරක්ෂාව තහවුරු කිරීමේ වැදගත්කම පිළිබඳවද සාකච්ජා කර ඇත.
මෙම සාකච්ඡාව සඳහා ඉන්දුනීසියාවේ සහ ආසියාන් සංවිධානයේ ශ්රී ලංකා තානාපතිනි සෂිකලා ප්රේමවර්ධන මහත්මිය සහ ශ්රී ලංකා ආනයන හා අපනයන පාලක ජනරාල් ටී. ටී. උපුල් මලී ප්රේමතිලක මහත්මියද සහභාගී වී ඇත.
