සටහන: සශිකලා මධුෂාණී
ලෝකය(අවුට්බවුන්ඩ් ටුඩේ) ඔක්තෝම්බර් මස 12 : යේමනයේ හූති සටන්කාමීන් විසින් සෞදි අරාබියේ රියාද් අගනුවර පිහිටි කිං ඛාලිඩ් ජාත්‍යන්තර ගුවන් තොටුපළ ඉලක්ක කර යළිත් ප්‍රහාරයක් එල්ල කර තිබේ.
ඔක්තෝබර් 10 වැනිදා එල්ල වූ ප්‍රහාරයෙන් පුද්ගලයන් 12 දෙනෙකු මියගොස් තවත් 300කට අධික පිරිසක් තුවාල ලැබූ අතර, නවතම ප්‍රහාරයෙන් එක් පුද්ගලයෙකු මියගොස් තවත් 11 දෙනෙකු තුවාල ලබා තිබේ.
නවතම ප්‍රහාරය හේතුවෙන් සෞදි අරාබියේ ප්‍රධාන ගුවන් ප්‍රවාහන මධ්‍යස්ථානවල ආරක්ෂාව සම්බන්ධයෙන් යළිත් අවධානය යොමුව ඇති අතර, ගුවන් ගමන් සහ මගී ආරක්ෂාව පිළිබඳව ද ආරක්ෂාව තර කර ඇත.
රියාද් ගුවන් තොටුපළට එල්ල වූ ප්‍රහාරවලට අමතරව, සෞදි අරාබියේ නැගෙනහිර ප්‍රදේශයේ පිහිටි කිං ෆාහඩ් ජාත්‍යන්තර ගුවන් තොටුපළ ද ඉලක්ක කර ප්‍රහාරයක් එල්ල වූ බව වාර්තා වන අතර හූති හමුදා ප්‍රකාශක යාහ්යා සරී ප්‍රකාශ කර ඇත්තේ රියාද් සහ දම්මාම් ගුවන් තොටුපළවලට අමතරව, සෞදි රාජ්‍ය තෙල් සමාගමක් වන සවුදි ඇරම්කෝහි (Saudi Aramco) ස්ථාන දෙකක් ද ඉලක්ක කර ප්‍රහාර එල්ල කළ බවයි.
කෙසේ වෙතත්, එම තෙල් පහසුකම්වලට සිදුවූ හානි පිළිබඳ සම්පූර්ණ තොරතුරු ස්වාධීනව තහවුරු කර නොමැත.
මෙම ප්‍රහාර මාලාව හේතුවෙන් ගුවන් තොටුපළවල ආරක්ෂක තත්ත්වය සහ සිවිල් ගුවන් ගමන්වල අඛණ්ඩතාව පිළිබඳ ගැටලු මතුව තිබේ. සෞදි අරාබියේ ගුවන් තොටුපළ සහ ගුවන් කලාප භාවිත කිරීමේදී ප්‍රවේශම් වන ලෙස ගුවන් සමාගම් හා සංචාරකයන්ට අනතුරු ඇඟවීම් ද නිකුත් කර ඇති අතර මේ අතර, එක්සත් ජනපද ජනාධිපති ඩොනල්ඩ් ට්‍රම්ප් සෞදි අරාබිය හූති සටන්කාමීන්ට එරෙහිව සිදුකරන මෙහෙයුම් සඳහා එක්සත් ජනපදය ද සහභාගී වීමේ හැකියාව සලකා බලමින් සිටින බව වාර්තා වේ.
